მსოფლიოში ალბინოსთა ყველაზე დიდი ხვედრითი წილი აღმოსავლეთ აფრიკაზე, განსაკუთრებით ტანზანიაზე მოდის. აქ მათი რაოდენობა 15-ჯერ აღემატება დანარჩენი ქვეყნების საშუალო მაჩვენებელს. ზანგი-ალბინოსები ტანზანიაში მოსახლეობის ყველაზე დაუცველი ნაწილია, რომლებზეც ნამდვილი ნადირობაა გამოცხადებული: მათ იჭერენ, ნაწილებად ჭრიან და ნაჭრებს წამლად ყიდიან. დიახ, სამწუხაროდ არ მოგესმათ...

მსოფლიოში საშუალოდ 1 ალბინოსი მოდის 20 ათას ადამიანზე. ტანზანიაში ეს მაჩვენებლი 1:1400 არის, კენიასა და ბურუნდიში - 1:5000.

ცნობილია, რომ ამგვარი გადახრის გენის მატარებელი ორივე მშობელი უნდა იყოს, რათა შვილი "თეთრი" გაჩნდეს. ტანზანიაში ალბინოსები საზოგადოების ყველაზე გარიყულ ნაწილად ითვლებიან და იძულებული არიან ერთმანეთს შორის იქორწინონ. შეიძლება სწორედ ეს არის ქვეყანაში ამგვარი ადამიანების უჩვეულოდ დიდი ხვედრითი წილის მიზეზი.

5 საუკუნეზე მეტია ტანზანიაში არსებობს ცრურწმენა, რომლის მიხედვით, ალბინოსის სხეულს სამკურნალო თვისება აქვს, რის გამოც მათზე ნამდვილი ნადირობაა გამართული.

2006 წლიდან მოყოლებული ამგვარი "ნადირობის" შედეგად 71 ალბინოსი დაიღუპა, 31-მა კი "მონდირეებისგან" თავის დაღწევა შეძლო. ალბინოსების სხეულის ნაწილებს: ენას, კიდურებს, თვალებს "მონადირეები" 50-100 ათას დოლარად აბარებენ ჯადოქრებსა და ე.წ. მკურნალებს. ეს თანხა საშუალო ტანზანიელის 25-30 წლის მუშაობის გასამრჯელოს ტოლფასია.

ამგვარი არაადამიანური ქმედებები ალბინოსთა წინააღმდეგ ტანზანიაში დიდი ხნის მანძილზე არ ისჯებოდა და მსხვერპლს ქვეყნის სამართალდამცავი ორგანოები უგზოუკვლოდ დაკარგულად აცხადებდა. მაგრამ დასავლეთის ქვეყნების მკაცრმა გაფრთხილებამ და კანიბალიზმის წინააღმდეგ მკაცრი ქმედებების გატარების მოთხოვნამ აიძულა ხელისუფლება დათმობაზე წასულიყო, აეკრძალა ალბინოსებზე ნადირობა და სასჯელი დაეწესებინა "მონადირეებისთვის".

2009 წელს ტანზანიაში პირველი სასამართლო გაიმართა: სამმა მამაკაცმა 14 წლის ალბინოსი დაიჭირა და ნაწილებად აკუწა მკითხავებისთვის მიყიდვის მიზნით. ბოროტმოქმედებს ჩამოხრჩობა მიესაჯათ.

მაგრამ კანონმდებლობის გამკაცრებამ უარესი შედეგი გამოიღო: სიკვდილით დასჯის თავიდან ასაცილებლად მონადირეები აღარ კლავდნენ ალბინოსებს, არამედ აჭრიდნენ მათ სხეულის ნაწილებს. სხეულის განზრახ დაზიანებისთვის ქვეყნის კანონმდებლობა მხოლოდ 5-დან 8 წლამდე თავისუფლების აღკვეთას ითვალისწინებს.

ბოლო 3 წლის მანძილზე 90-ზე მეტ ალბინოსს მოკვეთეს სხეულის ნაწილები. ამგვარი "ოპერაციების" შედეგად 3 დაიღუპა.

ტანზანიის ალბინოსთა 98% ვერ აღწევს 40 წელს. ამის მიზეზი მათზე მიმდინარე ნადირობის გარდა არის ფიზიოლოგიური ფაქტორებიც: მათი თვალები და კანი განსაკუთრებით

მგრძნობიარეა ულტრაიისფერი სხივების მიმართ, ამირტომ 16-18 წლის ასაკში ალბინოსები 60-80%-ით კარგავენ მხედველობას, 30 წლის ასაკში კი 60% კანის კიბოთი ავადდება.

ჯანმრთელობის დასაცავად ალბინოსებისთვის აუცილებელია მზისგან დამცავი კრემისა და სათვალის ტარება, მაგრამ ტანზანიის უღარიბეს მოსახლეობას ამის საშუალება არა აქვს...

ტანზანიელი ალბინოსების ერთადერთი იმედი დასავლეთის ყურადღებაა: ევროპიდან და ამერიკიდან მათთვის ჩააქვთ პრეპარატები და, რაც მთავარია, აშენებენ სპეციალურ ინტერნატებს, სადაც გარემოსგან იზოლირებულად, მაგრამ დაცულად ცხოვრობენ ალბინოსები...

მძიმე სტატია გამოვიდა, მაგრამ ზოგჯერ ხომ თავად ცხოვრებაა მძიმე...