მას შემდეგ, რაც "ნაციონალური მოძრაობა" ოპოზიციაში გადაბარგდა სოფო ნიჟარაძესაც ნაკლებად ვხედავთ ეკრანებზე. აქამდე თუ მის გარეშე არცერთი კონცერტი არ ტარდებოდა, დღეს ის თითქოს პასიურია. ასეა თუ ისე საზოგადოების დიდი ნაწილი მიიჩნევს, რომ მომღერალს შემოქმედებითი პაუზა აქვს. ალბათ არ იცოდით, რომ სოფო აქტიურადაა ჩართული ქვეყნის გარეთ მიმდინარე ღონისძიებებში. მომღერალმა იმღერა პრაღაში, “თბილისის დღეებზე”, 4 მაისს იზმირის მე-8 საერთაშორისო პოეზიის ფესტივალის საპატიო სტუმარი გახლდათ, მიწვეული იყო CNN TÜRK-ის საკვირაო პროგრამაში Pazar Keyfi, რომელსაც 1.5-2.2 მილიონი ადამიანი უყურებს, მოგვიანებით კი აზერბაიჯაში ერთ-ერთ სატელევიზიო გადაცემაშიც მიიღო მონაწილეობა. 26 მაისს სოფო ნიჟარაძე ავღანეთში შეხვდა და ქართველ ჯარისკაცებს საქართველოს ჰიმნიც უმღერა.
"მე ვარ ამაყი და ბედნიერი, რომ საქართველოს დამოუკიდებლობის დღე გავატარე სამშობლოსთვის თავდადებულ ჯარისკაცებთან ერთად, მსოფლიოს ერთ-ერთ ყველაზე ცხელ წერტილში ავღანეთში, ვარ ამაყი, რომ მხვდა წილად ბედნიერება შემესრულებინა საქართველოს ეროვნული ჰიმნი სამშობლოსთვის თავგანწირული პატრიოტების წინაშე, რომლებიც ხშირად თავიანთი სიცოცხლის ფასად ემსახურებიან საქართველოს და სამშობლოდან შორს, მაგრამ მაინც შეუპოვრად იბრძვიან ჩვენი ქვეყნის მომავლისთვის! გილოცავთ ყველას საქართველოს დამოუკიდებლობის დღეს, ღმერთი იყოს თითოეული თქვენთაგანის და სრულიად საქართველოს მფარველი!"-წერდა მომღერალი "ფეისბუქის" საკუთარ გვერდზე.

სულ ცოტა ხნის წინ კი ინტერნეტსივრცეში გავრცელდა სოფოს ახალი კლიპი. "დიდი მადლობა მარიკა აროშიძეს და "ბასტი-ბუბუს" არაჩვეულებრივი კლიპისთვის, ჩემს ერთ-ერთ უსაყვარლეს სიმღერაზე "საქანელა", რომელსაც ვასრულებ "ბასტი-ბუბუს" ბავშვებთან ერთად"-გვიამბობს მომღერალი. ახლა კი გთავაზობთ სოფოს ახალ კლიპს.