ცნობილია, რომ კავკასიურ-მედიტერანული ურთიერთობების მკვლევართა ერთ ნაწილს აინტერესებს სავსებით კონკრეტული საკითხი - შეიძლება თუ არა, კავკასიური ენები ხმელთაშუა ზღვის აუზის უძველეს (მედიტერანულ) ენათა მონათესავედ მივიჩნიოთ. ენათა გენეტიკური ნათესაობის დამტკიცების ყველაზე საიმედო კრიტერიუმად მიჩნეულია ბგერათა რეგულარული შესატყვისობების დადგენა შესადარებელ ენათა შორის. მაგრამ ამ მეთოდის გამოყენებას კავკასიურ და ხმელთაშუა ზღვის ენების შესწავლაში მკვლევართათვის ჯერ კიდევ არ მიუცია სანდო შედეგები. და მაინც, სპეციალისტთა ერთი ნაწილის აზრით, ამ ენათა შეპირისპირებისას უკვე გამოვლენილი ფაქტები - წინაბერძნულში დადასტურებული ქართველური კომპონენტები და პირიქით, ქართველურ ენებში გამოვლენილი ეგეოსური ელემენტები - საკმარისია იმისთვის, რომ ამ ენათა შორის არსებული ნათესაობა დავასაბუთოთ. სხვანი კი, ამის საპირისპიროდ, ამტკიცებენ, რომ ჯერჯერობით შეუძლებელია ვილაპარაკოთ კავკასიურ-მედიტერანული ენობრივი სათესაობის შესახებ.