რუსეთის „შავ სიაში“ შედის აშშ-ის სულ მცირე ხუთი გარდაცვლილი მოქალაქე, რომლებსაც რუსეთში შესვლა სამუდამოდ აქვს აკრძალული. ამას რუსეთის საგარეო საქმეთა სამინისტროს მიერ გამოქვეყნებული სია ადასტურებს.

აღსანიშნავია, რომ რუსეთის ხელისუფლებამ იცის მათი დაღუპვის შესახებ, მაგრამ საჭიროდ მიიჩნევს სანქციების რეჟიმის შენარჩუნებას. სანქცირებულ 963 ამერიკელს შორის ხუთი ადამიანია მონიშნული „გარდაცვლილი“, ხოლო მათი გვარის გასწვრიბ გარდაცვალების თარიღიც კი არის მითითებული.

რუსეთის ფედერაციის საგარეო საქმეთა სამინისტრო ოფიციალურ ახსნა-განმარტებაში აღნიშნულია, რომ მათ მიმართ მოქმედებს „რუსეთში შესვლის სამუდამოდ აკრძალვა".

კერძოდ, რუსეთში ვიზიტი ეკრძალება ყოფილ სენატორ ჯონ მაკკეინს (გარდაიცვალა 2018 წელს), ყოფილ კონგრესმენ ელსი ჰესტინგსს (გარდაიცვალა 2021 წელს), CIA-ს დირექტორის ყოფილ პირველ მოადგილეს მელისი დრისკოს, ყოფილ მოსამართლე სტივენ ო'ნილს, ყოფილ ამერიკელ სამხედროს ჯერემი სივიტსს რომელიც ამ წლის დასაწყისში გარდაიცვალა.

როგორც ცნობილია, ცოტა ხნის წინ რუსეთში შესვლა სამუდამოდ აეკრძალათ აშშ-ის პრეზიდენტ ჯო ბაიდენის და მისი ვაჟ ჰანტერს, ცნობილი მსახიობი მორგან ფრიმანს და "ფეისბუქის" შემქმნელ მარკ ცუკერბერგს. რუსეთის საგარეო საქმეთა სამინისტროს განცხადებაში ნათქვამია, რომ ეს არის „საპასუხო ზომები ანტირუსული სანქციების წინააღმდეგ, რომელსაც მუდმივად აწესებს შეერთებული შტატები“.

გასულ თვეში რუსეთმა "შავ სიაში" შეიყვანა დიდი ბრიტანეთის პრემიერ-მინისტრი ბორის ჯონსონი და დიდი ბრიტანეთის მთავრობის სხვა მაღალჩინოსნები.

მათი ცნობით, ბრიტანეთის პრემიერ-მინისტრის, მინისტრთა კაბინეტის წევრებს და რიგ პოლიტიკოსებს რუსეთში ჩასვლა აეკრძალებათ.

მოსკოვის საგარეო საქმეთა სამინისტროს შავ სიაში მოხვდა დიდი ბრიტანეთის საგარეო უწყების ხელმძღვანელი ლიზ ტრასი, ასევე ვიცე-პრემიერი დომინიკ რააბი, თავდაცვის მდივანი ბენ უოლესი და სხვები.

ნუსხაში ასევე არის დიდი ბრიტანეთის ყოფილი პრემიერ-მინისტრი ტერეზა მეიც.