სხვა უსაქმურმა იაპონელმა უსაქმურობა შემოსავლის წყაროდ აქცია 2022, 11 იანვარი, 17:41  იაპონელი შოძი მორიმოტო ადრეული ასაკიდანვე შეეჩვია იმას, რომ მას ყველა უსაქმურად თვლიდა - კლასელები, ოჯახი, კოლეგები... ახლა ის 38 წლისაა და გადაწყვიტა უსაქმურობა ექცია თავისი ცხოვრების აზრად. ცხოვრებაში ყველაზე ხშირად მას ესმოდა, რომ ის არააქტიურია, არ აინტერესებს კარიერული წინსვლა, მიყვება დინებას და განზე დგება, როდესაც მის გარშემო ყველანი წინ მიდიან. საბოლოოდ, კოლეჯის დამთავრების და ერთმანეთის მსგავსი რამდენიმე მოსაწყენი სამუშაოს შეცვლის შემდეგ, მან გადაწყვიტა, რომ მისი ნამდვილი მოწოდება არის უსაქმურობა. -მე მთლიანად გავაცნობიერე, რომ არაფერი არ უნდა გავაკეთო, რაც იმას ნიშნავს, რომ დიდ ძალისხმევას არასდროს ვიყენებ არაფერში - განუცხადა მორიმოტომ ჟურნალისტებს. 2018 წლიდან ის უმუშევარია და ერთადერთი რასაც აკეთებს არის ის, რომ ყოველგვარი ძალდატანების გარეშე სთავაზობს თავის კომუნიკაციას სამყაროს. ამავდროულად, მამაკაცი საერთოდ არ მოითხოვს ანაზღაურებას, საკმარისია გადაიხადოთ მგზავრობის საფასური, თუ გინდათ, რომ სადმე გაგყვეთ. ან უყიდოთ საჭმელი, თუ გინდათ, რომ თქვენთან ერთად დაჯდეს კაფეში.  ხანდახან ესეც არ არის საჭირო. ის უბრალოდ მზად არის საუბრისათვის, ან მოგისმინოთ და მხარი აგიბათ საუბარში. ის საკუთარ თავს Rent-a-Man-ს უწოდებს (კაცი ქირით), მაგრამ ეს არ ნიშნავს იმას, რომ ის მზად არის დრო დახარჯოს გარკვეულ სამუშაოზე, თუნდაც ყველაზე მარტივზე. მაგალითად: მან უკვე უარყო შეთავაზება ბინაში დახმარებაზე, დალაგება- დასუფთავებაზე, პირად მეგობრობაზე, პოზირებაზე და ფულის სანაცვლოდ გარკვეული ადგილების მონახულებაზე. მაგრამ ის სიამოვნებით გამოგყვებათ საყიდლებზე მაღაზიაში ან თქვენთან ერთად პარკში სკამზე ჩამოჯდება.  - ადამიანები სხვადასხვაგვარად მიყენებენ. ზოგი მარტოსულია. ზოგს რცხვენია სადმე მარტო წასვლა. ზოგს სურს, რომ ვინმეს შთაბეჭდილებები გაუზიაროს. რაც გასაკვირია, არის პიროვნებების, გარემოებებისა და სიტუაციების უზარმაზარი მრავალფეროვნება. ის თითქმის ყოველდღე მაოცებს, - თქვა მორიმოტომ. ის ყოველდღიურად სამ პაემანზე მიდის და სწყინს, თუ ვინმე თავის უსაქმურობას „სამუშაოს“ უწოდებს, იუწყება CBS. არა და თუ გავითვალისწინებთ იმას, რომ ბოლო დროს უსაქმური იაპონელის ცხოვრების წესისადმი ინტერესი გაიზარდა - დაახლოებით 250 ათასი გამომწერი ჰყავს მას სოციალურ ქსელებში, თავად კი უკვე დაწერა ოთხი წიგნი, სადაც უამრავ ადამიანთან ურთიერთობის შედეგად მიღებულ გამოცდილებას უზიარებს მკითხველს და ამასთანავე მასზე უკვე მსოფლიო პრესა წერს, უნდა ვიფიქროთ, რომ თავის უსაქმურობით კარგ ფულს შოულობს. 
ასევე იხილეთ    905 2-ს მოსწონს
|
  |
Intermedia.ge © 2011-2024 წელი
საავტორო უფლებები დაცულია
 |
