რუსთაველის თეატრის მსახიობი ნიკა ქაცარიძე 43 წლის ასაკში მოულოდნელად გარდაიცვალა. ინფორმაციას რუსთაველის თეატრი ავრცელებს.

“უდიდეს მწუხარებას და ტკივილს განიცდის ჩვენი თეატრი დღეს. გარდაიცვალა მსახიობი ნიკოლოზ ქაცარიძე..”, – წერია თეატრის სამძიმრის წერილში.

გარდაცვალების სავარაუდო მიზეზად, გული სახელდება.

ნიკა ქაცარიძე 2005 წლიდან შოთა რუსთაველის სახელობის სახელმწიფო თეატრის მსახიობია; რუსთაველის თეატრის სცენაზე განსახიერებული როლები: სერ ტობი ბელჩი (უ. შექსპირის "შობის მეთორმეტე ღამე ანუ როგორც გენებოთ", რეჟ.: რ. სტურუა), ხელოსანი (დ. კლდიაშვილის "დარისპანის გასაჭირი", რეჟ.: რ. სტურუა, ზ. პაპუაშვილი), დაცვის ბიჭი – ენრიკო (ლ. ბუღაძის "ჯარისკაცი, სიყვარული, დაცვის ბიჭი და ... პრეზიდენტი", რეჟ.: რ. სტურუა), მეფე (არჩილ სულაკაური "სალამურა", დამდგმელი რეჟ.: რ. სტურუა, რეჟისორები – რ. ჩხაიძე, დ. კვირცხალია), მოკარნახე (ნ. იორდანოვის "გონზაგოს მკვლელობა", რეჟ.: გ. გოშაძე), ნიკოლა (ჟ. დელი, ჟ. სიბლეირასი "გაუმარჯოს ბუშონს", რეჟ.: ი. ბაკურაძე), მეფარნე (ა. დე სენტ-ეგზიუპერის "პატარა უფლისწული", რეჟ.: გ. თოდაძე); მედუქნე (თომას ბერნჰარდის "სანახაობის მომწყობი – Der Theatermacher", რეჟ.: ქრისტიან პაპკე); მონაწილეა სპექტაკლებისა: "მალე მოვალ წვიმად", "ჯადოსნური ღამე", "შობა ტიფლისში", "ბედი ქართლისა", "საახალწლო ნობათი";

ფილმოგრაფია 2003: "მიცვალებულთა კუნძულზე" (2003, იუჰანსონი-ჰუმელის მოახლე, რეჟ.: თეიმურაზ კვანტალიანი); ვაკის თეატრალური სარდაფი: გებრიელ ბონიფაციუსი (მიხო მოსულიშვილის კომიკური თრილერი "საშობაო ბატი კომშით", რეჟ.: გურამ ბრეგაძე).

ასევე მაყურებელს ნიკა ქაცარიძე დაამახსოვრდა სერიალიდან "შუა ქალაქი", სადაც იგი ზარმაცი ხელოსნის, ამირანის როლს ასრულებდა.