"ცხოვრების ყველა ეტაპმა ჭკუა უნდა გასწავლოს. უნდა შეძლო გარჩევა, ვინ ყალბია და ვინ ნამდვილი. თუ ადამიანებთან ურთიერთობისას ისევ შეცდომა დაუშვი და გული გატკინეს, ეს სხვისი მოხერხებულობის ბრალი არა, შენი შეცდომების და უჭკუობის ბრალი უფროა.

როგორ უნდა ენდო მას, ვინც ასჯერ გიღალატა. არ თქვა, რომ შანსი მივეციო… არა, ბუნებით მოღალატე შანსს ვერ არა, არ გამოიყენებს, რადგან მან ზუსტად იცის რას რატომ აკეთებს.

თავს იტყუებ და თან ცდილობ, ლამაზად შეფუთო… ასჯერ არა, ერთხელ მოღალატე, სულ მოღალატეა… ეს ადამიანის ბუნებაა, როგორც ერთგულება, როგორც პატიოსნება…

არც შური უნდა იძიო სხვაზე, არც საქმეები უნდა გაურჩიო… არაფერია სასაუბრო… დასვი ქვის წერტილი და გაუშვი მის გზაზე… ნუ დაელოდები, როდის ექნება სინანული… ვწუხვარ, მაგრამ სინანულიც მაღალი ინტელექტის, ზეჰუმანიზმის მახასიათებელი ნიშანია…

ფსევდო განათლებულს და ცარიელი სიტყვებით მოლაყბეს არც სინანული ექნება და პირიქით, საკუთარ თავს დაგამადლის, გეტყვის, მადლობა მითხარი, რომ შენს გვერდით ვიყავიო…

ჰოდა, მართალიც იქნება, რადგან მას იმხელა პრივილეგია მიანიჭე, იფიქრა, მეტიც უნდა მოეცაო…

დაინდე თავი, შეინარჩუნე შენი ნამდვილი ბუნება და ნუ შექმნი ხელოვნურად ადამიანებს ისეთად, როგორებიც არასდროს იქნებიან!.."-წერს სოციალურ ქსელში მამა პეტრე კოლხი.