ეს უჩვეულო დიზაინის კაბები დაგარწმუნებთ, რომ ფანტაზიას საზღვარი არ აქვს. იქმნება წარმოდგენა, თითქოს კაბები უკან, უხერხულ ადგილას ამოჭრილია და მშვენიერი ქალბატონების მთელი "ავლა-დიდება" გარეთაა გადმოსული, ან კიდევ, თითქოს ნაჭერი ისეა შეთხელებული, რომ სხეულის უკანა ნაწილი ჩანს. სინამდვილეში არც ერთია და არც მეორე. ეს ყველაფერი ემსგავსება ზევქსისის შემოქმედებით ნიჭს, იგი იმდენად რეალისტურად ხატავდა ფიგურებს, რომ ფრინველებმა ერთხელ მის მიერ დახატული ყურძნის მაგიდიდან აკრეფა სცადეს, ან კიდევ ჯოტოსა და ბუზის ამბავს: თავისი მასწავლებლის - ჩიმაბუეს ტილოს ზედაპირზე ჯოტომ დახატა ბუზი, რომელიც პედაგოგს ნამდვილი ეგონა; ჩიმაბუე იქამდე ცდილობდა, ბუზი მოეცილებინა თავისი ნამუშევრისათვის, სანამ არ მიხვდა, რომ შეგირდმა იოხუნჯა. დიახ, ეს კაბებიც უბრალოდ მეტისმეტად რეალისტურადაა მოხატული და არავითარი სიშიშვლე არაა მათ ფოტოებზე ასახული.