82 წლის ასაკში, ავადმყოფობის შემდეგ გარდაიცვალა საქართველოს ტელევიზიის ყოფილი დიქტორი და წამყვანი დონარა კინწურაშვილი.

ჰქონდა ჟურნალისტური პრაქტიკის 45 წლიანი გამოცდილება. ის იყო ერთ-ერთი პირველთაგანი დიქტორი საბჭოთა პერიოდის საქართველოში.

21 წლისა იყო პირველად ტელევიზიაში რომ მივიდა 1963 წელს. იყო ფილოლოგი, ინგლისური ენის სპეციალისტი. ტელევიზიაში მუშაობდა 2004 წლამდე.

წლების განმავლობაში იყო საინფორმაციო გამოშვება "მოამბისა" და საბავშვო გადაცემა "ცეროდენას ეკრანის" წამყვანი.

ერთ-ერთ ინტერვიუში ის იხსენებს როგორი იყო კომუსიტების დროს მუშაობა:

„დღევანდელი წამყვანებისგან განსხვავებით, ჩვენ ყოველმხრივ შეზღუდულები ვიყავით. საშინელი აპარატურა გვქონდა. რუსეთი რასაც გამოცვლიდა, იმას გვიგზავნიდა. ერთხელ, ცნობილი წამყვანები: ვალენტინა ლეონტიევა და ალექსანდრე (საშა) მასლიაკოვი ჩამოვიდნენ და უნდა ჩაგვეწერა გადაცემა. საშა რომ ჩამოვიდა და გადაცემის ჩაწერა დავიწყეთ, ხან ერთი კამერა ამოვარდა, ხან - მეორე. მაშინ ვიდეო არ იყო და ძალიან გავწვალდით, მაგრამ გადაცემა 6 საათში ჩავწერეთ. საშა მასლიაკოვი გაგიჟდა, როგორ მუშაობთო. სწორედ მაშინ თქვა საშამ: ქართველები, მართლაც, რომ სასწაული ხალხი ხართ“.