გერმანიის ნაკრების ყოფილმა ფეხბურთელმა, კრისტოფ მეცელდერმა დიუსელდორფის სასამართლოს წინაშე ფაქტობრივად აღიარა, რომ ბავშვთა პორნოგრაფიას ავრცელებდა.

ფეხბურთელის ადვოკატები ყველანაირად შეეცადნენ, რომ სასამართლოს საკუთარი გადაწყვეტილების შესახებ ინფორმაცია ვებგვერდიდან წაეშალა და პრესას ამის შესახებ არაფერი შეეტყო. ვებგვერდზე იდო მხოლოდ განსასჯელის ასაკი და ინიციალები, თუმცა ამ ინფორმაციების გასაჯაროებაში ადვოკატები ხედავდნენ მეცელდერის პირადი უფლებების შეზღუდვას, მაგრამ სასამართლომ მათი არგუმენტები არ გაითვალისწინა. უფრო მეტიც: სასამართლომ განაცხადა, რომ გაასაჯაროებს მიღებული მსჯავრის შესახებ გადაწყვეტილებასაც. ამას სასამართლო მაღალი საზოგადოებრივი ინტერესით ხსნის. მეცელდერი საჯარო პირია და ამიტომ მის პირად უფლებებზე ჩვეულებრივი ადამიანის ცხოვრების მსგავსი დაცვის მკაცრი წესები არ მოქმედებს.