რუსთავი 2-ის ყოფილმა გენერალურმა დირექტორმა, ნიკა გვარამიამ რუსთაველის გამზირზე გადაცემა #სირცხვილიაში განაცხადა, რომ მის მიერ დაფუძნებული ახალი ტელევიზიის სახელი იქნება "მთავარი არხი".

მისი თქმით, მისი ტელევიზია არის ამბიციური, როგორც თავად: "პირველად ვამბობ ამას, ახალ ტელევიზიას რომელიც მე დავაფუძნე და ინვესტორები შემოვლენ, ერქმევა „მთავარი არხი“. ის იქნება ნამდვილად მთავარი და იქნება ძალიან მაგარი ტელევიზია, ძალიან მაგარი ხალხით".

"ჩემი სულჩაბერილი და 7 წლის ნალოლიავები რუსთავი 2 არ არის ჩემი კონკურენტი, ეს არის სამიზნე, რომელიც უნდა გავანადგურო ბიძინა ივანიშვილის რუსთავი 2 განადგურდება", — განაცხადა ნიკა გვარამიამ.

მანვე ლიცენზიის მინიჭება-არმინიჭების საკითხზეც გაამახვილა ყურადღება და აღნიშნა, რომ ხელშეშლის შემთხვევაში ის ეთერში მაინც გავა.

„ფეხებზე მკიდია, ლიცენზიას თუ არ მომცემენ, ეთერში მაინც გავალ. არ მაინტერესებს, უკანონოდ გავალ ეთერში, მართლა არ მაინტერესებს, “ - აღნიშნავს გვარამია.

შეგახსენებთ, გვარამიამ არხის შექმნა მას შემდეგ დააანონსა, რაც ტელეკომპანიის ახალმა მფლობელმა, ქიბარ ხალვაშმა გაათავისუფლა. ნიკა გვარამიამ განაცხადა, რომ მოლაპარაკებებს ტელეკომპანია იბერიის მფლობელებთან აწარმოებს.ქიბარ ხალვაშმა რუსთავი 2 მას შემდეგ გადაიფორმა, რაც სტრასბურგის სასამართლომ დროებითი შეჩერების მექანიზმი გააუქმა.

ახალი არხის გახსნის თაობაზე გვარამიამ თავდაპირველად რამდენიმე კვირის წინ სოციალურ ქსელში დაწერა.

ნიკა გვარამიამ სოციალურ ქსელში პოსტი გამოაქვეყნა, სადაც აცხადებს, რომ პარტნიორებთან ერთად, საზოგადოების ჩართულობით და დახმარებით, გააკეთებს საუკეთესო არხს. ამ იდეის განხორციელებაში კი გვარამიას თქმით, მას მისი გუნდი დაეხმარება.

„მოკლედ, მეგობრებო, არც თუ ისე დიდი ხნის, თუმცა ძალიან მძიმე და ინტენსიური ფიქრის შემდეგ, გადაწყვეტილება მიღებულია. ბევრ ფიქრს მოყვა ბევრი კონსულტაცია: პროფესიონალებთან, პოტენციურ ინვესტორებთან ქვეყნის შიგნით და მის ფარგლებს გარეთ, და, რაც მთავარია, ამ ქვეყნის პატრიოტებთან და დემოკრატიის გულშემატკივრებთან.

"გადავწყვიტე: რამდენიმე პარტნიორთან ერთად, გავაკეთო ამ ქვეყნის მთავარი ტელევიზია, მთავარი და საუკეთესო. უკეთესი, ვიდრე ნებისმიერი სხვა. უკეთესი, ვიდრე ის, რომელიც აქამდე ყველაზე საუკეთესო მგონია.

"ჩემთვის ეს, ალბათ, ცხოვრების მთავარი გამოწვევაა - მე კრიზის-მენეჯერი ვარ, არ მიყვარს რუტინა და არასდროს მიშენებია ნულიდან. მე შემიძლია გავაცოცხლო მკვდარი კომპანია, მაგრამ არასდროს მიმიცია დასაბამი ახალი კომპანიის სიცოცხლისთვის. ამ გამოწვევაში ზუსტად ვიცი, ვისი დახმარება მჭირდება, ვინ იქნება ჩემი მთავარი დასაყრდენი - ჩემი გუნდი.

"ჩემი ამბიცია მხოლოდ საუკეთესოს გაკეთებაა, და საუკეთესოს, ცხადია, მხოლოდ საუკეთესოები გააკეთებენ.

"ბოლო მოვლენების შემდეგ, უკიდურესად დაღლილმა, ერთად ერთი დღის განმავლობაში ვიფიქრე ქვეყნიდან წასვლაზე და დალაგებულ ცხოვრებაზე მშვიდ ქვეყანაში. ახლა, ამ დღის გამო, საჯაროდ ბოდიშს ვუხდი საკუთარ თავს, საკუთარ ოჯახს და ყველას, ვინც ელოდით ჩემს გადაწყვეტილებას, ვინც გულშემატკივრობთ ჩემს საქმეს, ვინც ფიქრობთ, რომ პატრიოტებმა და მედასავლეთეებმა ქვეყანა არ უნდა დავთმოთ, ვინც ჩემს თანაგუნდელად მოიაზრებთ საკუთარ თავს.

"თავს უფლებას მივცემ და ჩემს თხოვნასაც გავაჟღერებ: სრულიად არ მეპარება ეჭვი, რომ ძალიან მალე ახალი ტელევიზია ქვეყნის მთავარი არხი გახდება და მის შემოსავლებს უკიდურესად ოპტიმისტურად ვუყურებ. თუმცა, თავიდან, მნიშვნელოვანი ინვესტიციებია საჭირო. ინვესტორები არიან, მაგრამ ხარჯი უფრო მეტია, როგორც ყოველთვის :) ძალიან მალე დავიწყებთ საჯარო კამპანიას ახალი ტელევიზიის დასახმარებლად. დიდი იმედი მაქვს თქვენი,

ვინც გულშემატკივრობთ ჩვენს საქმეს;

ვინც ფიქრობთ, რომ საქართველო არ უნდა დარჩეს სიმართლის ხმამაღლა მთქმელის და სამართლიანობის გუშაგის გარეშე;

ვინც ფიქრობთ, რომ დემოკრატიას სხვაგვარად მომავალი არა აქვს;

ვინც ფიქრობთ, რომ სწორს ვაკეთებთ, რომ არ ვთმობთ და ბრძოლას განვაგრძობთ;

ვინც ფიქრობთ, რომ ჩვენი გზა დასავლეთია და ამაზე ყოველდღე უნდა ვილაპარაკოთ; ვინც ფიქრობთ, რომ დამნაშავე თანამდებობის პირების მხილება მედიის მთავარი საქმეა და დიდი საზოგადოებრივი სიკეთე; ვინც ფიქრობთ, რომ სამართლიანი ეგზიტპოლი არჩევნებისთვის უმნიშვნელოვანესია;

ვინც ფიქრობთ, რომ გამარჯვება რეალურია და იგი ახლოსაა;

"ვინც ფიქრობთ, რომ უზურპატორი უნდა წავიდეს ამ კამპანიას მალე დავიწყებთ იმ იმედით, რომ დაგვეხმარებით, როგორც შეძლებთ. გპირდებით, თქვენს შემოწირულობას ვაქცევთ მნიშვნელოვან ინვესტიციად ჩვენი სამშობლოს წარმატებულ მომავალში, სიტყვის თავისუფლებასა და დემოკრატიაში.

"საქმე ძალიან ბევრია, მაგრამ დრო ძალიან ცოტა. გპირდებით, საუკეთესო ეთერი გელით, და გპირდებით, უფრო მალე, ვიდრე გგონიათ :)წარმატებები ჩვენს ერთობლივ ბრძოლას! ერთად მოვიპოვოთ თავისუფლება!“ - აღნიშული ნიკა გვარამიას პოსტში.