იმ დროს, როცა ადამიანების უმეტესობა ერთმანეთთან საერთო ენას ვერ პოულობს, ამერიკელმა მხატვარმა და სკულპტორმა, მაიკლ გრებმა შეძლო, საერთო ენა გამოენახა ბუნებასთან, კერძოდ - ჩვეულებრივ ქვებთან.

მხატვრის ხელში მისი დახვეწილი და ზუსტი მოძრაობებით ქვები, აგურები, ლოდების ნამსხვრევები თავბრუდამხვევ ტრიუკებს ატარებენ, უგულებელყოფენ რა გრავიტაციას და არაჩვეულებრივ ინსტალაციებს ქმნიან. შეიძლება გაიფიქროთ, რომ აქ გამოყენებულია წებო, თოკები ან მავთულები, რომლებიც თვალისაგან შეუმჩნევლად ამაგრებენ ქვებს ერთმანეთზე, მაგრამ არა...მაიკლი მუშაობს პატიოსნად, დახვეწილად, ასე რომ, ბალანსირებადი ქვები მის მიერ ფიზიკის კანონების და არქიტექტურის პრინციპების ცოდნაზეა დამყარებული და არა მნახველის მოტყუებაზე.

მაიკლის ბავშვობის გატაცება - შეეგროვებინა და ლამაზად დაელაგებინა ერთმანეთზე სხვადასხვა ზომისა და ფერის ქვები, გადაიქცა მასშტაბურ არტ-პროექტად, სახელწოდებით Gravity glue, რომელსაც უკვე რამდენიმე წელია, გრები მთელ თავისუფალ დროს უთმობს.

მდინარეების და ტბების ნაპირზე სეირნობის თუ ზღვის პირას ნამზეურის მიღების დროს მაიკლი მუდამ პოულობს დროს, წყალში მდებარე ქვებიდან შექმნას რამოდენიმე სახალისო ფიგურა, რომლებიც თვითმხილველებში დიდ გაოცებას იწვევს. ზოგიერთი ადამიანი სპეციალურად მოდის იმის სანახავად, თუ როგორ მუშაობს ოსტატი. ძალიან ბევრს სჯეროდა, რომ მაიკლი რაღაც ეშმაკობას მიმართავდა თავისი ქვის ინსტალაციების გასაკეთებლად, მაგრამ მას შემდეგ, რაც საკუთარი თვალით იხილეს ის მუშაობის პროცესში, მათი ეჭვები აღფრთოვანებამ და ხელოვანისადმი უდიდესმა პატივისცემამ შეცვალა.

რა სამწუხაროა, რომ მაიკლის ნამუშევრებს დიდი დღე არ უწერიათ - ინსტალაციები, რომლებიც გრავიტაციის კანონებსაც კი არ ემორჩილებიან, მალე კარგავენ თავიანთ ფორმას და წყლისა და ქარის, წვიმისა და თოვლის ზეგავლენით იშლებიან. მხოლოდ ფოტოსურათებზე ინარჩუნებენ ისინი თავიანთ სახეს, აძლევენ რა მნახველს საშუალებას, კვლავ და კვლავ დატკბეს ამერიკელი მხატვრის მიერ შექმნილი ხელოვნების უნიკალური ნიმუშებით.

და ბოლოს, მინდა ნახოთ ეს არაჩვეულებრივი ვიდეო, რომელშიც დაწვრილებითაა ასახული ამერიკელი ხელოვანის მუშაობის პროცესი.