ამერიკის შეერთებულ შტატებში საეჭვო ამანათების გამგზავნ პირს, 56 წლის ცეზარ სეიოკს 58 წლით თავისუფლების აღკვეთა ემუქრება.

ამის შესახენ აშშ-ის გენერალურმა პროკურორმა, ჯეფ სეშნსმა განაცხადა. „დღეს მას ბრალი ხუთი დანაშაულისთვის წავუყენეთ, მათ შორის შტატებს შორის ასაფეთქებელი მოწყობილობების გადატანისთვისაც“, - თქვა პრესკონფერენციაზე ქვეყნის მთავარმა პროკურორმა.

დაკავებული სასჯელაღსრულების დაწესებულებაში გადაიყვანეს. ის მთლიანობაში 12 საეჭვო ამანათის გაგზავნაშია ეჭვმიტანილი, რომელიც ბოლო დღეების განმავლობაში არაერთმა ცნობილმა ადამიანმა მიიღო. დღეს გახდა ცნობილი, რომ აშშ-ში პოლიტიკოსებისთვის გაგზავნილი ბომბები ინტერნეტში გავრცელებული ინსტრუქციით გააკეთეს.

პარალელურად, აშშ-ის პრეზიდენტმა, დონალდ ტრამპმა ვაშინგტონსა და ნიუ-იორკში სახიფათო ამანათების სერიულ დაგზავნასთან დაკავშირებით თეთრ სახლში ბრიფინგი გამართა და განმარტა, რომ ამ საკითხზე გამოძიება მიმდინარეობდა.