საინგილოში გამართულ ქართულ კონცერტებზე საქართველოს დროშის გამოფენა იკრძალება. ჰერები ამას პირად საუბრებშიც ადასტურებენ და ამბობენ, რომ ადგილობრივი ხელისუფლების მხრიდან პრობლემები მოჰყვება. ჰერეთში, კახის რაიონში საახალწლო ღონისძიება ჩატარდა, თუმცა მხოლოდ აზერბაიჯანის რესპუბლიკის დროშა იყო გამოფენილი.

განსხვავებული სურათია საქართველოში, ეთნიკური აზერბაიჯანელების მიერ გამართულ დღესასწაულებზე. გასულ წლებში საქართველოს სხვადასხვა ქალაქში გამართულ აზერბაიჯანულ ღონისძიებებს თუ გადავხედავთ, ყველა შემთხვევაში სცენაზე ორივე ქვეყნის ეროვნული დროშაა გამოფენილი და არცერთი ფაქტი არ არსებობს, სადაც მხოლოდ ქართული დროშა იქნებოდა და აზერბაიჯანის არ ყოფილიყო წარმოდგენილი.

ამას გარდა, საქართველოში ჩატარებულ აზერბაიჯანულ ღონისძიებებში მთავარი ტექსტები და მილოცვები აზერბაიჯანულად გაცილებით დიდი შრიფტით წერია, ვიდრე ქართული. მეტიც, ნოვრუზ-ბაირამის დღესასწაულის მისალოცად მარნეულში ჩასული საქართველოს პრემიერმინისტრი და პრეზიდენტი პატივისცემის ნიშნად მისალოც ტექსტსაც ყოველთვის აზერბაიჯანულ ენაზე ამბობენ. სამწუხაროდ, მოძმე აზერბაიჯანი იგივე ნაბიჯებით არ გვპასუხობს საინგილოში მცხოვრები ქართველების მისამართით.

წარმოგიდგენთ ფოტომასალას, სადაც ნათლად ჩანს, რომ საქართველოს რამდენიმე ქალაქში სხვადასხვა დროს გამართულ სხვადასხვა ღონისძიებაზე, მათ შორის „ნოვრუზ ბაირამის“ ღონისძიებებზე აზერბაიჯანის რესპუბლიკის დროშებიც საპატიო ადგილს იკავებს.