5 ოქტომბერს, ნაციონალურმა მოძრაობამ ვარდების მოედანზე აქცია გამართა. პარტიის ლიდერების განცხადებებში მხარდამჭერთა განსხვავებული რაოდენობა სახელდებოდა. მათი განცხადებების თანახმად აქციას თურმე 50-100 ათასი ადამიანი ესწრებოდა.
საინტერესოა რამდენი ადამიანი იმყოფებოდა რეალურად აქციაზე? ამის გასარკვევად აქციის მონაწილეთა დათვლის აპრობირებულ მეთოდს "ჯეიკობსის მეთოდს" მივმართოთ. 5 ოქტომბრის აქციაზე მონაწილეთა სიმჭიდროვე ყველაზე მაღალი ტრიბუნის სიახლოვეს გახლდათ და ის შესაბამისად A კატეგორიას მიეკუთვნებოდა ანუ 1 კვადრატულ მეტრზე 4, 3 ადამიანი მოდიოდა. თუმცა თუ კადრებს დავაკვირდებით ასეთ კატეგორიას მხოლოდ ტრიბუნის სიახლოვეს 10-15 მეტრი რადიუსში არსებული ტერიტორია წარმოადგენდა. ამის შემდეგ, დაახლოებით 15-20 მეტრის სიგრძის მონაკვეთზე სახეზე გვაქვს B კატეგორია ანუ 1 კვადრატულ მეტრზე 2, 5 ადამიანი. აქციის დანარჩენი განლაგება მეჩხერი გახლდათ და ის C კატეგორიაა ანუ 1 ადამიანი 1 კვადრატულ მეტრზე.
როგორც გაირკვა აქციის მონაწილეთა დაკავებული ტერიტორიის საერთო ფართობი 4000 მ²-ს წარმოადგენდა. კვადრატების პრინციპის და სხვა მეთოდების გარეშეც თამამად შეგვიძლია ვთქვათ, რომ აქციის მონაწილეთა განლაგება საშუალოდ B კატეგორიას (1მ² =2, 5 ადამიანი) არ აღემატებოდა. ავიღოთ მაქსიმუმი რაც ამ მონაცემებიდან შეგვიძლია გამოვიანგარიშოთ - 4000 x 2, 5 = 10 ათასი. დასკვნა: ნაციონალების აქციას მაქსიმუმ 10 ათასამდე ადამიანი ესწრებოდა .