როგორც ბრაზილიური საფეხბურთო კლუბ “კორიტიბას” ოფიციალური ვებგვერდი იუწყება, კლუბის ხელმძღვანელობა ქობულეთის “შუქურას” პრეზიდენტ რევაზ ჩელებაძეს შეხვდა და საქმიანი შეთანხმება შედგა, რომლის მიხედვით, “კორიტიბას” ფეხბურთელები ევროპულ სივრცეში მოსახვედრად “შუქურაში” გააგრძელებენ კარიერას. ამ ეტაპზე კონკრეტულ ფეხბურთელებზე ღიად საუბარი არ ყოფილა, თუმცა როგორც “კორიტიბას” კონსულტანტმა პიერ ბულუსმა აღნიშნა, ბრაზილიური კლუბისთვის მნიშვნელოვანია ევროპულ კლუბებთან დაახლოება და საქმიანი ურთიერთობის დამყარება. შეხვედრას ასევე ესწრებოდა გოჩა ალადაშვილი, რომელსაც ბრაზილიურ ფეხბურთში საქმიანობის ათ წელზე მეტი ხნის გამოცდილება აქვს. შეხვედრაზე იმყოფებოდნენ “კორიტიბას” მფლობელი პაულ მედინა, ვიცე-პრეზიდენტი რიკარდო გუერა და პრეზიდენტი ალვივერდე როჯერიო ბაკელარი.
“1999 წელს ბრაზილიაში ჩამოვედი, მას შემდეგ ამ ქვეყანაში ვცხოვრობ, ბევრი ადამიანი გავიცანი და ვიცნობ აქაურ გარემოს, საქართველო კი ჩემი სამშობლოა. ასე რომ, აღნიშნული შეთანხმება ჩემთვის ძალიან სასიხარულოა” – აღნიშნა გოჩა ალადაშვილმა.
“კორიტიბას” ოფიციალურ ვებგვერდთან საუბარში მცირე კომენტარი გააკეთა რევაზ ჩელებაძემ.
“პირველ ყოვლისა მსურს მადლობა გადავუხადო “კორიტიბას.” კლუბს, რომელსაც დიდი ისტორია აქვს. “შუქურას” მიზანი ევროპალიგის გათამაშებაში მონაწილეობის მიღებაა, რაშიც ბრაზილიურ კლუბთან ურთიერთობა დაგვეხმარება” – აღნიშნა “შუქურას” პრეზიდენტმა.
“კორიტიბას” ოფიციალურ ვებგვერდზე ასევე აღნიშნული იყო, რომ 1980 წელს ჩელებაძემ საბჭოთა კავშირის ნაკრების მაისურით ბრაზილიის ნაკრების წინააღმდეგ ამხანაგურ მატჩში ითამაშა.

დიმა შარიქაძე

www.worldsport.ge