ახალს არაფერს ვიტყვით, უბრალოდ კიდევ ერთხელ დავაფიქსირებთ, რომ ქართველი მომღერლები რომლებიც წლებია საქართველოს საზღვრებსგარეთ მოღვაწეობენ, უფრო და უფრო მრავლდებიან, მაგრამ - სამწუხაროდ პირდაპირი გაგებით, რადგან მათი რიცხვი ყოველწლიურად იზრდება, დაწყებული იმ დღიდან, რა დღესაც მაგალითად სოსო პავლიაშვილმა (უკვე საქართველოს მოღალატედ შერასხულმა მომღერალმა) გადაწყვიტა საკუთარი თავისთვის, მომავლისთვის და კარიერისთვის ეშველა და თავი დიდ რუსეთს, მოსკოვს შეაფარა...

როგორც იტყვიან ბილიკი გაიკვალა და ამის შემდეგ კი, დაიწყო და დაიწყო ქართველთა გადინება ერთმორწმუნე რუსეთისკენ, სხვანი თუ მშენებლობაზე, მცირე ოფისებში, სავაჭრო დაწესებულებებში და ა.შ. საქმდებოდნენ, ქართველ მომღერლებს საკუთარი ნიჭის რეალიზაცია მოუხდათ, ზოგს დიდ სცენაზე, ზოგს პატარაზე, ზოგს როგორ გაუმართლა და ზოგს როგორ და ასე დაიცალა ქართული ესტრადა ნელ-ნელა ნიჭიერი ქართველი ვარსკვლავებისგან...

მანანა თოდაძე, ქეთა თოფურია, დათო ხუჯაძე, თამარ გვერდწითელი, ზურა დოიჯაშვილი, მამუკა ონაშვილი, არჩილ ფურცელაძე, არჩილ ცანკაშვილი, თემურ თათარაშვილი... ეს, იმ ადამიანების მცირე სიაა ვინც თავისი აწმყო დიდი ხნით დაუკავშირა რუსეთს და იქაურ შესაძლებლობებს, მიუხედავად იმისა, რომ საქართველოში ვიღაცეები (!) მათ მოღალატის იარლიყს ნემსის და ძაფის გარეშე აკერებენ - არ შეიძლება მომღერლების არგაგება, რადგან საქართველოში ვერცერთი მთავრობის ვერცერთმა მომსახურებამ, მათ ვერ შეუქმნა ის პირობები, რომ მხოლოდ გასტროლებზე ეფიქრათ და არა, ემიგრანტობაზე... თუმცა ეს სხვა თემაა.

რამდენიმე დღის უკან საქართველოში დროებით დაბრუნებულმა თემურ თათარაშვილმა, ზურა დოიჯაშვილმა, მამუკა ონაშვილმა, გიგა კვენეტაძემ, აჩიკო ცანკაშვილმა, აჩიკო ფურცელაძემ და ებრაელმა მომღერალმა ანგელინა კაპლანი, ნანა ცინცაძის ტექსტზე შექმნილი მუსიკისთვის, მაღალი ხარისხის კლიპი გადაიღეს, რომელიც რა გასაკვირია, რომ სწორედ ქართველების მოფერებაზე და სიყვარულზეა, - როგორც „ვარსკვლავებმა“ ექსკლუზიურად გაარკვია კლიპის გადაღებები უკვე მორჩა, უძვირფასესი ტექნიკური საშუალებები, კადრები ვერტმფრენებიდან, უმაღლესი ხარისხი და ა.შ., გადაღებული მასალა სამონტაჟოდ აშშ-ში გაიგზავნება და ის, დაახლოებით ერთ თვეში ქართულ ტელე-სივრცეშიც გამოჩნდება, ჯერ ექსკლუზიურად ალბათ, რომელიმე პოპ-ტელე-შოუში და შემდეგ მას, მთელი მსოფლიოს ქართველობაც იხილავს.