შვეიცარიელი მეხორცე მთელი სამი წლის განმავლობაში ატყუებდა თავის მუსულმან-კლიენტებს. როგორც Mad World News იუწყება, მას ბრალს სდებენ იმაში, რომ ღორის ხორცს საქონლის ხორცად ასაღებდა.

სკანდალი აგორდა საყასბოს ერთ-ერთი გეგმიური სანიტარული კონტროლის დროს, როდესაც ინსპექტორი წარმოდგენილი ხორცის ხარისხით დაინტერესდა. ხორცის ხარისხი აშკარად არ შეესაბამებოდა იმას, რაც მის იარლიყზე იყო მითითებული. ამან ეჭვი აღუძრა სანიტარული კონტროლის ინსპეტორებს და გადაწყვიტეს ხორცი შემდგომ შემოწმებაზე გაეგზავნათ, რამაც ფარდა ახადა ყასაბის ოინებს. გამოირკვა, რომ უკანასკნელი 3 წლის მანძილზე მუსულმან კლიენტებზე საქონლის ხორცის ნაცვლად გაყიდული იყო სამ ტონამდე ღორის ხორცი. დანაშაულში ეჭვმიტანილმა მეხორცემ განაცხადა: ასე იმიტომ ვიქცეოდი, რომ ღორის ხორცი გამესაღებინა, მუსულმანი მორწმუნეები ხომ ღორის ხორცს არ ჭამენო.

ასეა თუ ისე, ამ ოინით ციურიხელმა მეხორცემ კარგა ბლომად ფული იშოვა, რადგან საქონლის ხორცის ფასი გაცილებით მეტია ღორის ხორცის ფასზე, ხოლო თავის "ნაყალბევ" საქონლის ხორცს ის ნამდვილის ფასის შესაბამისად ყიდდა.

მოსამართლის გადაწყვეტილებით მეხორცეს 6 თვით პატიმრობა მიესაჯა. ასევე მას დაეკისრა ფულადი ჯარიმის 18 000 დოლარის გადახდა.