ბათუმის ნავსადგურში თურქეთის სამხედრო-საზღვაო ძალების ხომალდი TCG YILDIRIM F-243 იმყოფება. სამხედრო გემი საქართველოს ტერიტორიულ წყლებში გუშინ, 4 მარტს, 9 საათზე შემოვიდა.

საზღვაო ტრანსპორტის სააგენტოს ცნობით გემი "ნატოს" პროგრამის ფარგლებში შემოვიდა.

"ვიზიტის მიზანია, NATO-ს ოპერაციული შესაძლებლობების კონცეფციის შეფასებისა და უკუკავშირის პროგრამის ფარგლებში, საქართველოს სასაზღვრო პოლიციის სანაპირო დაცვის დეპარტამენტის მცურავი საშუალებების „ოჩამჩირე“ და „დიოსკურია“ მეორე დონის თვითშეფასების (SEL-2) ჩატარება. აღნიშნული პროცესი ქართველი და „ნატო“-ს სამხედრო-საზღვაო ძალების სარდლობიდან მოვლენილი წარმომადგენლების (შემფასებლების) მხარდაჭერით ხორციელდება" - წერია სააგენტოს განცხადებაში.

ხომალდის დახვედრის ცერემონიაზე საქართველოს მხრიდან იმყოფებოდნენ: აჭარის მთავრობის თავჯდომარე თორნიკე რიჟვაძე, ბათუმის მერი არჩილ ჩიქოვანი, საზღვაო ტრანსპორტის სააგენტოს დირექტორი ალექსი ახვლედიანი, შინაგან საქმეთა სამინისტროს სასაზღვრო პოლიციის სანაპირო დაცვის დეპარტამენტის დირექტორი, I რანგის კაპიტანი რამაზ პაპიძე, თურქეთის მხრიდან კი - თურქეთის ელჩი საქართველოში ალი ქაან ორბაი, გენერალური კონსული ბათუმში რიზა ქაღან ილმაზი, თურქეთის სამხედრო ატაშე პოლკოვნიკი ილჰან ოქთენდურალი, ასევე სხვა ოფიციალური პირები.

თურქული სამხედრო ხომალდის დახვედრის ცერემონია ბათუმის პორტში, ფოტო: საზღვაო ტრანსპორტის სააგენტო | 04.03.2024

საზღვაო ტრანსპორტის სააგენტოს ცნობით თურქეთის სამხედრო ხომალდი ბათუმის ნავსადგურს 10 მარტს დატოვებს.