რუსული ბანქოს დასტაში არსებული სათამაშო ქაღალდზე ნახატების სახით გამოსახული "ვალეტი", "დამა", "მეფე" სულაც არ ყოფილა მხატვრის ფანტაზიის ნაყოფი, თითოეული მათგანი რეალური პიროვნება აღმოჩნდა რუსეთის საიმპერატორო კარზე ჩატარებული ბალ-მასკარადიდან.

1903 წელს საიმპერატორო ზამთრის სასახლეში ჩატარდა ბალ-მასკარადი, სადაც მონაწილეობას იღებდა რუსეთის ელიტარული საზოგადოება, ღონისძიება იმდენად კოსტუმირებული და სანახაობრივი უნდა ყოფილიყო, როგორიც მანამდე არასდროს ყოფილა რუსეთის ისტორიაში. შესაბამისად თითოეულმა მონაწილემ შეაკერინა სპეციალურად ტანსაცმელი ამ ღონისძიებისათვის, მონაწილეებმა გამოიყენეს ყველაზე ძვირფასი საიუველირო ნაკეთობები რაც კი გააჩნდათ.

კოსტუმირებული ბალის მონაწილეების გადაღება რუსეთის იმპერატორის მეუღლის სურვილი იყო, ღონისძიების გადასაღებად მოიწვიეს საუკეთესო ფოტოგრაფები, რომლებსაც უნდა გადაეღოთ თითოეული მონაწილე.
როგორც შემდეგ იმპერატრიცა ალექსანდრას მხლებელი ახალგაზრდა ქალი ბარონესა სოფია კარლის ასული ბუკსგევდენი წერდა: "ღონისძიების მონაწილეები ერთმანეთს ეჯიბრებოდნენ თავის წარმოჩენაში საგანგებოდ შეკერილი ტანსაცმლით და ძვირფასეულობით, ცეკვავდნენ ძველ რუსულ ცეკვებს, ამ დროს არავინ ფიქრობდა იმაზე, რომ რუსეთის თავზე შავი ღრუბლები იკრიბებოდა მასობრივი გამოსვლების სახით, არც შორეულ აღმოსავლეთში იყო სიმშვიდე, მაგრამ საიმპერატორო კარი მხოლოდ დროსტარებით იყო დაკავებული და არავინ ფიქრობდა ხვალინდელ დღეზე.

ღონისძიებამ ბრწყუნვალედ ჩაიარა, იმპერატრიცა თავად მიესალმა მონაწილეებს და კარგი დროსტარება უსურვა.

ღონისძიების თითოეული მონაკვეთი ფოტოგრაფებმა გადაიღეს, რათა მონაწილეების შთამომავლებს დარჩენოდათ გარდასულ დღეთა შესახებ წარმოდგენა".

აღნიშნული ღონისძიების აღსანიშნავად გადაწყდა ბანქოს დასტის გამოშვება, ესკიზები 1911 წელს მიაწოდეს მაინის-ფრანკფურტში არსებულ სათამაშო ქაღალდების ქარხანას, რომელიც "დონდორფის" ბრენდით უშვებდა სათამაშო ქაღალს და სამორინეებისათვის სპეციალურ მოწყობილობებს, ესკიზები დამუშავებული სახით დაუბრუნეს რუსეთს, სადაც საიმპერატორო ბანქოს მწარმოებელმა ქარხანამ დაიწყო მისი წარმოება.

და მაინც, ვინაა ასახული ბანქოს დასტის ნახატებში?