ვარსკვლავები სელებრითების თამამი და პროვოკაციული "ლუქები" 2023, 14 დეკემბერი, 10:13 
ცნობილი სახეები თავიანთ გარეგნობას და ჩაცმულობას დიდ ყურადღებას აქცევენ, რადგან მათი პოპულარობა სწორედ იმაზეა დამოკიდებული რამდენად ლამაზად, მოდურად, ჰარმონიულად და სექსუალურად გამოიყურებიან. ზოგჯერ სელებრითები ამა თუ იმ ღონისძიებაზე დასასწრებად ყურადღების მიქცევის მიზნით ზედმეტად თამამ ჩაცმულობას ირჩევენ, რითიც მედიის ყურადღების ცენტრში ზედმეტი ძალისმხმევის გარეშე ექცევიან. თქვენ წინაშე არიან მსოფლიო შოუ- ბიზნესის ის ცნობილი წარმომადგენლები, რომლებმაც პუბლიკის ყურადღება მორიგ ჯერზე თავიანთი სიშიშვლით მიიპყრეს.
ჰაიდი კლუმი
ყოფილ მოდელს წელს 50 წელი შეუსრულდა, თუმცა ლამაზმანი არც კი ფიქრობს საყვარელ თამამ სამოსზე უარის თქმას. ყოფილი სუპერმოდელი საკუთარ თავს დიდ დროს უთმობს, ის აქტიურად არის დაკავებული სპორტით და კვების რაციონსაც დიდ ყურადღებას აქცევს, ამიტომაც თავს საკუთარი შრომის შედეგების დემონსტრირების უფლებასაც აძლევს.
ზენდაია
ზენდაიას ყოველი გამოჩენა - შოუა. ეფექტური გარეგნობის მქონე ნიჭიერი მსახიობი მნიშვნელოვანი ღონისძიებებისთვის ყოველთვის თამამ ჭრილიან და ღრმა დეკოლტიან კაბებს ირჩევს, ზენდაიას "ლუქები" ყოველთვის ელეგანტურობით, ჰარმონიულობითა და პიკანტურობით გამოირჩევა.
ჰეილი ბიბერი
გამჭვირვალე კაბებისა და მოკლე ქვედაბოლოების დიდი მოტრფიალე ჰეილი ყოველთვის ელეგანტურად გამოიყურება, ფერთა გამის, ნაჭრებისა და აქსესუარების არჩევა მან ისე იცის როგორც ნამდვილმა სტილისტმა. ჰაილის ჩაცმულობაზე ნამდვილად ვერ ვიტყვით რომ ვულგარულია, მაგრამ აი, თამამი და სექსუალური კი, ნამდვილად არის.
მეგან ფოქსი
ეს მსახიობი არაერთხელ იქნა აღიარებული მსოფლიოს ერთ-ერთ ყველაზე მაცდუნებელ ქალად. მან ეს ტიტული მათ შორის თამამი სამოსის სიყვარულის გამოც დაიმსახურა. "ტრანსფორმერების" ვარსკვლავი ტყავის, ლატექსის, კორსეტის, ღრმა ჭრილისა და დეკოლტის დიდი მოყვარული გახლავთ, რაც მისი ჩაცმულობის მიხედვით თუ ვიმსჯელებთ გასაკვირი სულაც არ არის.
ბელა ჰადიდი
მოდელი ეპატაჟური სამოსის დიდი მოყვარული არ გახლავთ. როგორც თავად ჰადიდი აღიარებს, მას უყვარს კომფორტული, ტანზე მომდგარი სამოსი, თუმცა საზოგადოება და პოპულარობა პერიოდულად მისგან ეპატაჟსაც ითხოვს, ამიტომ მოდელი მნიშვნელოვან ღონისძიებებზე დასასწრებად უპირატესობას ყოველთვის პროვოკაციულ და გამომწვევ სამოსს ანიჭებს.
რიტა ორა
მომღერალი საზოგადოების წინაშე გაშიშვლებას არ ერიდება. როგორც ჩანს, მთავარი, რაც მას საკუთარ ჩაცმულობაში აღელვებს არის ის, რომ ყოველთვის დასამახსოვრებელი და ეპატაჟური იყოს, რასაც იდეალურად ახერხებს კიდეც.
ელ ფენინგი
ახალგაზრდა მსახიობის ერთ-ერთმა ბოლო გამოჩენამ კანში მის თაყვანისმცემლებს გული აუჩქარა. საქმე კი "პაკო რაბანის" კაბის ზედის არარსებობაში მდგომარეობდა, სადაც მსახიობს "ღირსებებს" მხოლოდ უპრეტენზიო ყვავილები უფარავდა. როგორც ჩანს, წამოზრდილმა ფენინგმა, უპირატეობის მინიჭება სულ უფრო თამამი სამოსისთვის დაიწყო, რომელიც სხვათა შორის მას ძალიან უხდება და თან მასში არც ვულგარულად გამოიყურება.
ენ ჰეთეუეი
ბოლო პერიოდში მნიშვნელოვანი ღონისძიებებისთვის ამერიკელმა მსახიობმა სულ უფრო მგრძნობიარე და თამამი სამოსის არჩევა დაიწყო, თუმცა ის ძალიან ჰარმონიულად ახერხებს სექსუალობისა და ზომიერების შერწყმას. ფაქტია, რომ ტყავმა, მინიმ და ბადისებრმა კაბებმა მსახიობის იმიჯს სრულიად ახლებური და განსხვავებული იერი შესძინა.
|
