ცნობილმა მსახიობმა და ყოფილმა გუბერნატორმა არნოლდ შვარცენეგერმა ჯიმი კიმელის შოუში ისაუბრა მკაცრი მამობის შესახებ. "ვფიქრობ, ლმობიერი ვიყავი. მაგრამ ვთვლი, ამერიკული სტანდარტებით საკმაოდ მკაცრი ვიყავი"

მსახიობს ოთხი ზრდასრული შვილი ჰყავს - ქეთრინი, კრისტინა, პატრიკი და კრისტოფერი ყოფილ მეუღლესთან მარია შრაივერთან შეეძინა. მას ასევე ჰყავს უკანონო ვაჟი, ჯოზეფ ბაენა, რომელიც თავისი სახლის ყოფილი მოახლისგან ჰყავდა. ვაჟის არსებობას მსახიობი წლების განმავლობაში მალავდა, ხოლო როდესაც ყველაფერი გამოაშკარავდა, ოჯახიც დაენგრა.

შვარცენეგერი შვილებს ადრეული ასაკიდანვე ასწავლიდა დამოუკიდებლობას. "ბავშვებს ვეუბნებოდი, რომ საკუთარი საწოლი თავად უნდა გაესწორებინათ. მათ თავად უნდა გაესუფთავებინათ საშხაპე. მათ თავად უნდა გაესუფთავებინათ ტუალეტი, თავად უნდა გაერეცხათ ტანსაცმელი", - თქვა მან.

მსგავსი შემთხვევა მოხდა ქალიშვილ კეტრინთან, რომელმაც ორჯერ არ დააბრუნა ფეხსაცმელი თავის ადგილზე. გაბრაზებულმა მსახიობმა გოგონას ფეხსაცმელი ბუხარში გადააგდო. ”ასე აღვზარდე ჩემი შვილები”, - თქვა მან.

არნოლდ შვარცენეგერი დაქორწინდა მარია შრაივერზე, 1986 წელს (ცნობისთვის, ის შეერთებული შტატების 35-ე პრეზიდენტის ჯონ კენედის დისშვილია), მათი პირველი შეხვედრიდან თითქმის ცხრა წლის შემდეგ. ისინი 2011 წელს დაშორდნენ, მაგრამ განქორწინება ოფიციალურად მხოლოდ 2021 წელს დასრულდა.

მათი 25-წლიანი ქორწინება დასრულდა, როდესაც გაირკვა, რომ მსახიობს მოახლესთან მილდრედ ბაენასთან უკანონო ვაჟი შეეძინა. ბიჭი დაიბადა 1997 წლის 2 ოქტომბერს, რამდენიმე დღის შემდეგ, რაც მარია შრაივერმა გააჩინა მისი და შვარცენეგერის მეოთხე შვილი, ვაჟი კრისტოფერი.