ექსპერტები „თუ ვერ ასხვავებ ვიღაც ოთხი პირის სავიზო გაშავებას ხარების სიხარულისგან, მაშინ რას გვილოცავ?" - ამირან სალუქვაძე სალომე ზურაბიშვილს 2023, 8 აპრილი, 3:14 ექსპერტი სამხედრო-პოლიტიკურ და უსაფრთხოების საკითხებში ამირან სალუქვაძე საქართველოს პრეზიდენტის, სალომე ზურაბიშვილის განცხადებას აშშ-ის მხრიდან საქართველოს ოთხი მოსამართლის სანქცირების თაობაზე სოციალურ ქსელში ეხმიანება და შემდეგი სახის პოსტს აქვეყნებს: „ამ ადამიანმა როგორ იმუშავა ამდენი წელი საფრანგეთის დიპლომატიაში? ასეთი სიმჩატე და ასეთი საზიანო და გაუაზრებელი განცხადებები, წარმოუდგენელია. რელიგიაზე და დღევანდელ, ერთ-ერთ უძრავ საუფლო დღესასწაულის არსზე წარმოდგენა რომ არ აქვს, განმარტებაც არ სჭირდება, მაგრამ მაინც დავწერ ორი სიტყვით. ხარება მოგვილოცა და შემდეგ აგრძელებს, „მაგრამ არ მიხარიაო. დღეს შევხვდი ელჩსო" და ა.შ. სად ხარება და სად მოსამართლეები მათი ვიზებით და პრობლემებით?! ნეტა თუ იცის, ვინ ვის რა ახარა ამ დღეს? არსს თუ ჩაფიქრებია ოდესმე? ახლა დავწერ რა გამოუვიდა: გაბრიელ მთავარანგელოზმა მარიამ ღვთისმშობელს ახარა, რომ იგი შობდა იესო ქრისტეს, ძეს ღვთისას, მაგრამ არ მიხარია, რადგან და შემდეგ ბლა-ბლა-ბლა... თუ ხვდები რა დღეა, თუ რწმენით აღიქვამ დღევანდელ დღეს, თუ გიხარია და მთელ ერს ულოცავ, ელჩი, მურუსიძე და სავიზო შეზღუდვა როგორ გიფუჭებს სიხარულს? ისეოს შობის სიხარული როგორ უნდა გადაწონოს ზემოთ ჩამოთვლილმა? თუ ხარების არსს ვერ იაზრებ და ერთი სასწორით წონი, ვერ ასხვავებ ვიღაც ოთხი პირის სავიზო გაშავებას ხარების სიხარულისგან, მაშინ რას გვილოცავ? ბზობას აქცია აქვთ და ალბათ ასე მოგვილოცავს: „დღეს ისეო ზეიმით შევიდა იერუსალიმში, მაგრამ რა გვეზეიმება?!" - წერს ამირან სალუქვაძე. „მინდა, უპირველესად, მოგილოცოთ ხარების დღესასწაული. მინდა, საქართველო ვნახო მართლაც გახარებული და დაწყნარებული, თუმცა, უნდა ვთქვა, რომ დღეს არ მიხარია. არ მიხარია და კიდევაც განვიცდი ამერიკის შეერთებული შტატების სახელმწიფო მდივნის გადაწყვეტილებას. დღეს როგორც იცით, შევხვდი აშშ-ის ელჩს და მასაც გავუზიარე ჩემი განცდები. არ მიხარია და ვერ გამიხარდებოდა საქართველოს გამოცხადება სანქცირებული პირების მქონე ქვეყნების სიაში, რამეთუ ჩემთვის ყველაზე გასაფრთხილებელი სწორედ ქვეყნის რეპუტაციაა", - განაცხადა სალომე ზურაბიშვილმა გამართულ ბრიფინგზე. 246 1-ს მოსწონს
|