რუსეთის პრეზიდენტმა ვლადიმერ პუტინმა ოთხშაბათს საკუთარ ტელემიმართვაში რეზერვისტების მობილიზაცია გამოაცხადა. მობილიზაცია შეეხება რუსეთის 300 ათასამდე მოქალაქეს, რითაც პუტინი რუსული ჯარის გაძლიერებას იმედოვნებს, თუმცა გერმანელი ექსპერტები აცხადებენ, რომ ეს ჩიხური გზაა, რაც კარგად ნამდვილად არ დამთავრდება.

როგორც გერმანიის რეზერვისტთა კავშირის პრეზიდენტმა, პატრიკ ზენსბურგმა გერმანულ პრესას განუცხადა, აღნიშნული მობილიზაციის შედეგად რუსული არმია არათუ გაძლიერდება, არამედ პირიქით, დასუსტდება კიდეც.

“ასე ცუდად მომზადებული ჯარისკაცების ომში გაგზავნა შეურაცხმყოფელიც კია რუსეთის მოქალაქეებისთვის და ის კატასტროფით დასრულდება, ” - თქვა პატრიკ ზენსბურგმა.

“რეზერვისტების მობილიზაცია არაპოპულარული ნაბიჯია და ის შიდაპოლიტიკურ რისკებთან არის დაკავშირებული, ” - განაცხადა პოლკოვნიკმა ვოლფგანგ რიხტერმა die Welt-თან ინტერვიუში. “თუ რუსეთის სტრატეგიული ელიტა შეამჩნევს, რომ ეს გზა ჩიხისკენ მიდის, ამან შეიძლება პუტინის ბედი გადაწყვიტოს.”

რუსეთის არმია რომ უკრაინაში დამარცხებას დამარცხებაზე განიცდის, არახალია. ტექნიკის მხრივ კატასტროფა უკვე სახეზეა და რუსი სამხედროები უკვე მაცივრებს და სარეცხის მანქანებს აძრობენ ჩიპებს, რათა ტანკები და დაჯავშნული მანქანები აღჭურვონ. მალე ამ კატასტროფას ადამიანური ძალის მხრივ არსებული უმძიმესი რეალობა დაემატება, რაც ან პუტინის ხელისუფლების აღსასრულის მაუწყებელი იქნება, ან კიდევ საკუთრივ რუსეთი დაიშლება მარტივ მამრავლებად.