საქართველო თავისი ულამაზესი და თვალწარმტაცი ბუნებით მთელ მსოფლიოშია ცნობილი, თუმცა ერთ-ერთი ლოკაცია მაინც სხვებზე გაცილებით უფრო მეტ ყურადღებას იპყრობს. აქ სხვადასხვა ფერის საოცარი მდინარეები მოედინება, რომლებიც მიუხედავად იმისა რომ ერთ არხში იყრიან თავს, მათი ფერადი წყლები ერთმანეთს მაინც არ ერევა, სწორედ ეს იწვევს ტურისტების საყოველთაო აღფრთოვანებასა და გაოცებას.

უჩვეულო მდინარეები

თეთრი არაგვი წყლის ღია შეფერილობით გამოირჩევა, რაც იმით არის განპირობებული რომ გზად ის კირქვის ქანებისთვის დამახასიათებელ ფერს რეცხავს. სწორედ ამიტომ მდინარის ნაკადი გაჯერებულია ნივთიერებებით, რომლის წყალობითაც წყალი თითქმის თეთრი ჩანს.

შავი არაგვის დინების მიმართულებით კი, პირიქით, მუქი ფიქალები გვხვდება. ამიტომ ეს მდინარე თავის "მეზობელთან" შედარებით ბევრად უფრო მუქი ჩანს. იმ ადგილას, სადაც ეს ორი მდინარე ერთდება, რაც არ უნდა გაგიკვირდეთ ისინი ერთმანეთს არა თუ ერევიან, არამედ დინებას ცალ - ცალკე, სრულიად დამოუკიდებლად აგრძელებენ.

საინტერესოა, რომ ამ ორი უნიკალური მდინარის დინებაში კიდევ ერთი - ფშავის არაგვი ჩაედინება, თუმცა ამ მდინარეს დანარჩენ ორთან შედარებით ნაკლები დიდება ერგო, რადგან ის არანაირი საინტერესო ფერით არ გამოირჩევა, ხოლო მისი წყლები უბრალოდ არხში იკარგება. ერთ ნაკადად გაერთიანებული ეს მდინარეები მტკვრის დიდ შენაკადს წარმოქმნიან.

ლეგენდა დების შესახებ

რა თქმა უნდა, ასეთი მშვენიერი ბუნებრივი ფენომენის შესახებ, შეუძლებელი იყო ხალხს ლამაზი ლეგენდა არ შეეთხზა, რომელიც მდინარეების ამ უცნაურ ფერებს ახსნიდა. ამბობენ, რომ დიდი ხნის წინ, იმ ადგილას, საიდანაც სათავეს ეს მდინარეები იღებენ, ორი და ცხოვრობდა. ერთს ღია ფერის თმა ჰქონია, მეორეს კი - ღამესავით მუქი. ერთხელაც თურმე გოგონებს ერთი უფლისწული შეჰყვარებიათ, რომელმაც შავგრემანს ქერა არჩია.

მას შემდეგ, რაც შავგვრემანი უფლისწულმა უარყო, იქვე კლდეზე ჩამომჯდარი ის მწარედ აქვითინდა, თურმე გოგონას იმდენი ცრემლი დაუღვრია, რომ მისი ცრემლებისგან მდინარეც კი წარმოქმნილა, რომლის ტალღებისთვისაც თავი მიუცია. დამ, რომელმაც ამ ტრაგედიის შესახებ შეიტყო, კლდის მეორე მხარეს თავისს ერთგულ მეგობარს დიდხანს გლოვობდა. მისი ცრემლებიც მდინარედ ქცეულა, რომელშიც სიცოცხლე ამჯერად, ქერათმიანმა გოგონამ დაასრულა. საბოლოოდ, დები მდინარეების სახით ერთმანეთს ფასანაურთან შეხვდნენ, თუმცა ოჯახში არსებული უთანხმოება არასოდეს მოგვარებულა. ლეგენდის თანახმად, მათ შუა გაწოლილი მთა სწორედ ის უფლისწულია, რომელმაც ორი დის ტრაგედიაში უმთავრესი როლი შეასრულა.