დევიდ ბენეტი (Дэвид Беннетт), რომელსაც გენმოდიფიცირებული ღორის გული გადაუნერგეს, 8 მარტს გარდაიცვალა- განაცხადეს მერილენდის უნივერსიტეტთან არსებული სამედიცინო ცენტრის პრესსამსახურში. გარდაცვალების მიზეზი ჯერჯერობით არ სახელდება.
გადანერგილი გულით ბენეტმა ორ თვეზე ცოტა მეტი იცოცხლა.
დევიდ ბენეტი საავადმყოფოში 2021 წლის შემოდგომაზე არითმიით მოხვდა. ის ვერ აკმაყოფილებდა ვერც დონორის გულის გადანერგვისა და ვერც ხელოვნური სარქვლის ჩადგმის კრიტერიუმებს. მისი მდგომარეობა იმდენად მძიმე იყო, რომ ექიმებმა ის შეუერთეს ECMO აპარატს, რომელიც ერთდროულად მუშაობდა როგორც გულისთვის, ასევე ფილტვებისთვის. შემდეგ ექიმებმა შესთავაზეს, გამოეცადა მკურნალობის ექსპერიმენტული მეთოდი - გულის გადანერგვა გენმოდიფიცირებული ღორისაგან.
ექიმები დიდი ხანია ცდილობენ ცხოველებისგან ორგანოების გადანერგვას, მაგრამ ასეთი ორგანოების მიმღებებს სწრაფად უვითარდებათ მწვავე იმუნური რეაქცია და ორგანიზმი უარყოფს ტრანსპლანტაციას. მაგალითად, 1984 წელს ახალდაბადებულ ამერიკელ გოგონას პავიანის გული გადაუნერგეს, მაგრამ ის სამი კვირის შემდეგ გარდაიცვალა.
უარყოფის რეაქციის შესამცირებლად მეცნიერებმა დაიწყეს მოდიფიცირებული ღორების მოშენება, რომელთა უჯრედები ადამიანის იმუნური სისტემისთვის უცხო ანტიგენებს ნაკლებად შეიცავს.
ექიმებმა სწორედ ეს ახალი მეთოდი შესთავაზეს ბენეტის, მანამდე კი აუხსნეს ყველა შესაძლო რისკი, რაც შეიძლებოდა ამას მოჰყოლოდა. 2021 წლის 31 დეკემბერს შესაბამისმა სამსახურებმა ექსპერიმენტულ ოპერაციაზე ნებართვა გასცეს.
ბენეტიმ ოპერაციაზე თანხმობა განაცხადა. მას გადაუნერგეს კომპანია რევივიკორის (Revivicor) მიერ გამოყვანილი ღორის გული, რომლის გენომში ათამდე სხვადასხვა გენი იყო მოდიფიცირებული. 2022 წლის იანვრის შუა რიცხვებში, ექიმებმა განაცხადეს, რომ ოპერაცია წარმატებული იყო და ორგანიზმმა ახალი გული მიიღო.
ბენეტი საავადმყოფოში დარჩა, სადაც რეაბილიტაცია გაიარა, დაუკავშირდა ოჯახს და იმედოვნებდა, რომ მალე გამოწერდნენ სახლში. მერილენდის ექიმების წარმატების ფონზე, გერმანელმა ბიოტექნოლოგებმა განაცხადეს, რომ ისინი გაზრდიან დონორ ღორებს ასეთი ოპერაციებისთვის.
2022 წლის 9 მარტს მერილენდის კლინიკამ გამოაცხადა, რომ ბენეტი გარდაიცვალა. გარდაცვალების მიზეზი არ გახმაურებულა, ექიმებმა მხოლოდ აღნიშნეს, რომ რამდენიმე დღით ადრე მისი მდგომარეობა გაუარესდა. "ის მამაცი და კეთილშობილი იყო და ბოლომდე იბრძოლა", - წერს ბარტლი გრიფიტი (Бартли Гриффит), რომელმაც ბენეტს ოპერაცია გაუკეთა. მერილენდის უნივერსიტეტის მედიკოსების აზრით, ეს მაგალითი გვიჩვენებს, რომ ასეთი ტრანსპლანტაციები შესაძლებელია და მომავალშიც გაგრძელდება კლინიკური კვლევები და ოპერაციები.
