ფსიქოლოგია რა არის თვითეფექტურობა? 2021, 23 ივნისი, 17:05 თვითეფექტურობა სოციალურ-კოგნიტური თეორიის ძირითადი ცნებაა. ალბერტ ბანდურა თვითეფექტურობას განმარტავს, როგორც ინდივიდის რწმენას, რომ მას შეუძლია იმ ქმედებების დაგეგმვა და განხორციელება, რომლებიც საჭიროა მომავალ სიტუაციებთან გასამკლავებლად. თვითეფექტურობა არის ადამიანთა მოტივაციის, კარგად ყოფნის და პერსონალური მიღწევების საფუძველი, რადგან თუ ადამიანი არ დაიჯერებს, რომ მის ქცევას სასურველი შედეგების გამოღება შეუძლია, ქცევის განხორციელების და სირთულეებთან შეჭიდების ნაკლები სტიმული ექნება. ემპირიული კვლევები ადასტურებენ, რომ თვითეფექტურობა ადამიანთა ცხოვრების თითქმის ყველა ასპექტს ეხება, მაგალითად, ოპტიმისტურად ფიქრობენ თუ დამთრგუნველად და პესიმისტურად, როგორ უმკლავდებიან სტრესს და დეპრესიას და სხვ.
ბანდურას აზრით, თვითეფექტურობის მთავარი როლი არის ის, რომ ადამიანთა მოტივაციის დონე და ქცევები უფრო მეტად ეფუძნება იმას, რისიც სჯერათ, ვიდრე იმას, რაც ობიექტურად მართალია. ამ მიზეზით, ადამიანთა მიერ საკუთარ შესაძლებლობებზე წარმოდგენის გაგებით უკეთ შეიძლება მათი ქცევის წინასწარმეტყველება, ვიდრე მათი რეალური შესაძლებლობებით, ვინაიდან სწორედ თვითეფექტურობის აღქმა განსაზღვრავს იმას, თუ რას გააკეთებენ ინდივიდები არსებული ცოდნით და უნარებით. ეს გვეხმარება იმის ახსნაში თუ რატომ განსხვავდება ხშირად ადამიანთა ქცევები მათი რეალური შესაძლებლობებისგან და რატომ შეიძლება, რომ ერთნაირი შესაძლებლობების ადამიანებიდან ერთი ბევრად უფრო თავდაჯერებული იყოს, ვიდრე მეორე.
დაბალი და მაღალი თვითეფექტურობა, ხელსაყრელ ან არახელსაყრელ გარემო პირობებთან ერთად, გვაძლევს საშუალებას ვიწინასწარმეტყველოთ ქცევის 4 შესაძლო ვარიანტი:
იმის გამო, რომ ადამიანთა ქცევა როგორც ინდივიდუალური, ასევე კოლექტივისტურიცაა, თვითეფექტურობაც არის როგორც პერსონალური, ისე სოციალური კონსტრუქტი. კოლექტიური სისტემები ივითარებენ კოლექტიური ეფექტურობის გრძნობას. ეს არის ჯგუფის გაზიარებული რწმენა, რომ აქვთ მიზნების დასახვისა და მიღწევის უნარი. მაგალითად, სკოლები იყალიბებენ კოლექტიურ რწმენას, იმასთან დაკავშირებით, რომ მათ მოსწავლეებს შეუძლიათ სწავლა, მათ მასწავლებლებს შეუძლიათ სწავლება და ადმინისტრატორებს შეუძლიათ ისეთი გარემოს შექმნა, რომ მიზნების მიღწევა უფრო მარტივი იყოს. თვითეფექტურობას იკვლევენ სრულიად განსხვავებულ სფეროებში, როგორებიცაა, მედიცინა, სპორტი, ბიზნესი, სოციალური და პოლიტიკური მეცნიერებები, ფსიქოლოგია, ფსიქიატრია და განათლება. ფსიქოლოგიაში თვითეფექტურობაზე ფოკუსირდებიან ისეთ კლინიკურ საკითხებში, როგორებიცაა, ფობიები, დეპრესია. თერაპია, რომელიც სოციალური დასწავლის ისეთ პრინციპებს იყენებს, როგორიცაა მოდელირება, წარმატებულია ფობიების მქონე მოზრდილებთან და ბავშვებთან მუშაობისას. თვითეფექტურობა აქტიურად შეისწავლება განათლების სფეროშიც აკადემიურ მიღწევებთან, წარმატების და მარცხის ატრიბუციასთან, სოციალურ შედარებასთან, პრობლემის გადაჭრასთან და სხვა მნიშვნელოვან საკითხებთან ერთად. 124 შეფასება არ არის
|