ჯერ კიდევ ახალი მენეჯმენტის მიერ რუსთავი2-ის განახლებული ეთერის დაწყებისას დაანონსდა, რომ არხი პოსტსკრიპტუმისა და ღამის კურიერის აღდგენას აპირებდა. როგორც ჩანს სამაუწყებლო კომპანია მაყურებლისთვის მიცემულ პირობას ასრულებს და უახლოეს დღეებში ეთერში დაპირებულ და კარგად მონატრებულ გადაცემებს ჩაუშვებს.

უკვე ცნობილია, რომ თებერვლის ბოლოდან რუსთავი 2-ზე საკვირაო გადაცემა P.s ბრუნდება, მისი წამყვანი დავით კაკულია იქნება. გადაცემისთვის მზადება უკვე დაწყებულია და რამდენიმე კვირაში საკვირაო ანალიტიკური გადაცემა რუსთავი2-ის სამაუწყებლო ბადეში ჩაეშვება. მოსალოდნელი ცვლილებების შესახებ ჟურნალისტურ წრეებში უკვე ბევრს საუბრობენ.

ასევე, მარტის დასაწყიში არხზე ბრუნდება კიდევ ერთი ცნობილი და საყვარელი გადაცემა "ღამის კურიერი", რომელიც პოპულარობის ზენიტში იყო, როცა მისი წამყვანები გიორგი სანაია და ეკა ბერიძე იყვნენ. ღამის კურიერი სანაიას მკვლელობის შემდეგ დაიხურა, თუმცა მოგვიანებით, ეკა ხოფერიამ აღადგინა.

„ღამის კურიერის“ გარდა უახლოეს მომავალში ეთერში გავა კიდევ ერთი პოლიტიკური "თოქ-შოუ" რომლის, წამყვანებად დავით ცაგარელი და თორნიკე კვერენჩხილაძე განიხილებიან. ორივე მათგანი ტელეკომპანია „იმედის“ საინფორმაციო გამოშვება „ქრონიკის“ წამყვანი იყო. დავით ცაგარელი უკვე რამდენიმე თვეა „იმედიდან“ რუსთავი2-ის საინფორმაციო გუნდში გადავიდა და „კურიერის“ რეპორტიორებს შეუერთდა. თორნიკე კვერენჩხილაძე კი „იმედიდან“ „მაესტროს“ საინფორმაციო სამსახურში გადასვეს, თუმცა ბოლო ხანს არც ამ არხის ეთერში ჩანდა. როგორც ირკვევა, ისიც რუსთავი2-ზე გამოჩნდება.