ერთი ადამიანი მოკლეს უკრაინის ქალაქ ხმელნიცკში უშიშროების სამსახურის საოლქო სამმართველოს შტურმის დროს. ინფორმაციას უკრაინული მედია ავრცელებს.

"უშიშროების სამსახურის ცენტრალური შესასვლელის შტურმისას გარდაცვლილი ქალბატონი წინ იდგა. სხვადასხვა მონაცემებით, მას გულ-მკერდის არეში 6-დან 8 ტყვიამდე აქვს მოხვედრილი. ქალბატონი სასწრაფო სამედიცინო დახმარების მანქანაში გარდაიცვალა", - წერს vsim.ua.

ამასთან, ვრცელდება ინფორმაცია ორი დაჭრილის შესახებ. უკრაინული მედიის ცნობით, ხმელნიცკის უშიშროების სამსახურის შენობასთან შეკრებილებს შენობის ცენტრალური შესასვლელიდან და გვერდითა კარიდან ესროდნენ.