თუ თქვენი ცხოვრების სტილი მთელი დღის მანძილზე კომპიუტერთან ჯდომაა, ფეხები კი სიარულისგან კი არა, არამედ სკამზე დიდხანს ჯდომისგან გტკივათ, მაშინ ნამდვილად უნდა სცადოთ სამკურნალო ერთდღიანი შიმშილობა.

ანატომიის სასკოლო წიგნებში წაგიკითხავთ, რომ საკვები ადამიანის ნაწლავებს 2 დღის მანძილზე გადის, ამიტომ ჭამისგან ერთდღიან თავშეკავებას ნამდვილად ვერ უწოდებთ შიმშილს. კარგად ორგანიზებულ და ჩატარებულ განტვირთვის დღეს შეუძლებელია რაიმე სახის ზიანი მიაყენოს ორგანიზმს (თუ კუჭ-ნაწლავის ტრაქტის დაავადებები არ გაწუხებთ), სარგებელს კი საკმაო რაოდენობით მიიღებთ.

თუ კვირაში ერთხელ განტვირთვის დღეს მოაწყობთ, ორგანიზმში გასაოცარ ცვლილებებს მალევე შენიშნავთ. უნდა აღინიშნოს, რომ ამ დროს წყლის მიღება მნიშვნელოვანია.

*განტვირთვიდან მეორე დღეს სარკეში თქვენი ანარეკლის დანახვა ნამდვილად გაგახარებთ: თქვენი კანი გახდება გლუვი და ნაზი. შემცირდება თვალის ქვეშ არსებული ე.წ. ჩანთები და სახის შეშუპება.

*ერთ დღიანი შიმშილის შემდეგ ნაწლავები საკვებისგან სრულად გათავისუფლდება. ამის შემდეგ, საჭმლის მომნელებელი სისტემა საათივით ამუშავდება.

*ამასთან, სასწორზე დადგომისას აღმოაჩენთ რომ 1კგ. მოკლებული გაქვთ. მთავარია მეორე დღეს არ აინაზღაუროთ "დანაკარგი"... ხანგრძლივი დადებითი ეფექტის მისაღებად მნიშვნელოვანია რეგულარულად მოაწყოთ განტვირთვის დღეები.

*თქვენ ამით ორგანიზმში ნივთიერებათა ცვლის პროცესს ნორმაში მოიყვანთ. ამასთან, საკვებისგან თავშეკავების დროს ზრდის ჰორმონი გამომუშავდება, რომელიც ზრდასრულ ადამიანებში კუნთოვანი მასის მომატებას, ძვლების სიმტკიცეს და სხეულში დაგროვილი ცხიმების დაშლას უწყობს ხელს.

*ამით გააქტიურებთ ტვინის მუშაობას, ახალი იდეებისა და სიტუაციიდან არასტანდარტული გამოსავალის პოვნის შესაძლებლობის სტიმულირებას მოახდენთ. ზოგიერთმა ადამიანმა შესაძლოა შემოქმედებითი უნარიც კი გამოამჟღავნოს.

*დაეხმარებით ორგანიზმს სხვადასხვა დაავადებებთან ბრძოლაში. მსგავსი სახის შიმშილი ამცირებს გულ–სისხლძარღვთა დაავადებების რისკს, ათეროსკლეროზს, შეტევების რაოდენობას ასთმის დროს. ამასთან, ხანმოკლე შიმშილი ორგანიზმის იმუნური სისტემის მობილიზებას ახდენს.

*მინიმუმამდე დაიყვანთ საჭმელთან თქვენს ფსიქოლოგიურ დამოკიდებულებას, გათავისუფლდებით საკვების მუდმივად ღეჭვის მავნე ჩვევისგან.

კვირაში 1 დღე საკვების გარეშე – ეს რთული სულაც არ არის, თქვენ ამით სიმსუბუქის შეგრძნება გაგიჩნდებათ! გამოსცადეთ, ეს შესაძლებელია, განსაკუთრებით თუ სწორედ განეწყობით და მიზნად ორგანიზმის გაჯანსაღებასა და გაახალგაზრდავებას დაისახავთ.