ყველამ კარგად ვიცით, თუ რა სიტუაციაა თბილისის სამარშრუტო ტაქსებში... გადაჭედილ ტრანსპორტში მგზავრობა ისედაც აუტანელია, გაუსაძლისი სიცხე კი ორმაგად აწუხებს გაუთავებელ საცობებში მდგომ სამარშრუტო ტაქსების მგზავრებს. მიუხედავად იმისა, რომ თბილისის სატრანსპორტო კომპანიის ხელმძღვანელებმა არაერთგზის გააკეთეს განცხადება, რომ სამარშრუტო ტაქსებში დაყენებული კონდიციონერები სრულ წესრიგშია და მგზავრები ვალდებული არიან მძღოლს მისი ჩართვა მოთხოვონ ( ზოგიერთ სამარშრუტო ტაქსში ეს განცხადება თვალსაჩინო ადგილასაა გამოკრული), ყველა ჩვენგანს ჰქონია არაერთი შემთხვევა, როცა მძღოლი კონდიციონერს არ რთავს და მგზავრებს უცხადებს, კონდიცონერი გაფუჭებულია და ამიტომ ვერ ვრთავო.

სწორედ ასეთ ფაქტის მოწმე გახდა რეჟისორი რევაზ შატაკიშვილი, რომელიც თბილისში სამარშრუტო ტაქსში მომხდარს სოციალურ ქსელ Facebook-ში ჰყვება:

„მარშუტკაში“ არ იყო ჩართული კონდიციონერი. ამოვიდა ახალგაზრდა ქალი. გააპროტესტა. მძღოლმა აუხსნა, რომ კონდიციონერი გაფუჭებულია და ვერ ჩართავს.
ქალმა თავი გამოიდო - გამოაცხადეს, რომ ყველა მუშაობს და დავრეკავო.
მძღოლი: რაც გამოგიცხადეს, ყველაფერი შეგისრულეს? მიდი დარეკე, დარეკე და მითხრან რამე! აგერ აგდია გაფუჭებული კომპრესორი, არავის არაფერი გაუკეთებია და მე რანაირად ჩაგირთო კონდიციონერი...
მოკლედ, ქოცმა მგზავრმა „დაზადნა“ და ყველაფერი იმით დამთავრდა რომ მძღოლმა გულღვიძლიდან აგინა ივანიშვილს და ღარიბაშვილს ცოლ-შვილი.
ხმა არავის ამოუღია. იყო მდუმარება და სიცხე....
ადრე ეს მძღოლი სულ რადიო ”მაესტროს” და რადიო ”ობიექტივს” მასმენინებდა... კაი ხანია რადიოს აღარ რთავს...“, - წერს შატაკიშვილი.