მოგეხსენებათ, რომ ამა წლის 13 ივნისის ღამეს თბილისში მომხდარი სტიქიური უბედურების დროს 19 ადამიანი გარდაიცვალა და 3 უგზო-უკვლოდ დაიკარგა. დაკარგულთა რიცხვშია 27 წლის სერგო კაპანაძე, რომელსაც დღემდე უშედეგოდ ეძებენ. დღეს მისმა ოჯახმა შემდეგი სახის საგანგებო განცხადება გააკეთა:

"13 ივნისს მომხდარ სტიქიასთან დაკავშირებით სერგო კაპანაძის ოჯახს გვსურს გავაკეთოთ განცხადება და თხოვნით მივმართოდ იმ ადამიანებს, რომლებიც 13 ივნისს იმყოფებოდნენ იმ ადგილას, სადაც ეს ტრაგედია დატრიალდა და თავი დააღწიეს იმ საშინელებას, რაც იქ ხდებოდა და ცოცხლები გადარჩნენ.
გვინდა თხოვნით მივმართოთ, რომ შევიკრიბოთ მზიურის ტერიტორიაზე სტიქიის ეპიცენტრში, რათა პატივი მივაგოთ იმ დაღუპულ ადამიანებს, რომელთა ცხედრები ნაპოვნი იქნა და სოლიდარობა გამოვუცხადოთ იმ დაკარგული ადამიანების ოჯახებს, რომელთა ნახვაც ვერ ხერხდება. ჩვენი ოჯახის მზიურის ტერიტორიაზე შეკრების და თხოვნის მიზეზს წარმოადგენს ის, რომ სტიქიიდან უკვე 40 დღე გავიდა და ამ დრომდე ვერ მოხერხდა ჩვენი ოჯახის წევრის სერგო კაპანაძის ცხედრის პოვნა. მოხდეს იმ ღამის გახსენება ყველა იქ მყოფი გადარჩენილი ადამიანის მიერ და კიდევ ერთხელ აღვადგინოთ ის სურათი, თუ როგორ დაიწყო ყველაფერი და რა მოხდა იმ ღამეს.
რადგან მათი მონათხრობიდან და უშუალოდ მათი მოსმენით შეიძლება ჩვენთვის რაიმე უცხო გარემოება გამოიკვეთოს, იქნებ ვინმემე დაინახა ის დაკარგული ადამიანები რომელმა დინებამ წაიღო, სად შეიძლება კიდევ დაიწყოს ძებნა და სხვა გარემოებები, რომლებიც ჩვენთვის ამ დრომდე უცნობია და რაიმე ახალი ხელჩასაჭიდი ფაქტი გამოგვრჩა და ამ ადამიანები მონათხრობის შემდეგ მოხდეს რეაგირება იმ უცნობ დეტალებზე, რომლებიც გამოიკვეთება.
ამ განცხადების გაკეთების საფუძველს გვაძლევს ის, რომ ჩვენი ძალებით ხდება იმ სამძებრო სამუშაოების ჩატარება, რომლებიც ტარდება და ტარდებოდა ამ ბოლო პერიოდის გამავლობაში. ჩვენი მოთხოვნით ხდებოდა მაშველების და თავდაცვის ტექნიკის გამოყოფა და სამძებრო სამუშაოების ჩატარება, რის გამოც გვინდა მადლობა გადავუხადოთ თავდაცვის სამინისტროს და ყველა იმ მაშველს, რომლებიც ჩვენ გვერდით იყვნენ, რისი თქმაც არ შეგვიძლია შშს სამინისტროზე და მერიის სამსახურზე. ვთვლით, რომ არ მიმდინარეობს სათანადოდ იმ პიროვნებების ძებნა რომლებიც ამ დრომდე დაგარგულად ითვლებიან, არ მომხდარა სათანადოდ იმ სიტუაციის შესწავლა, რაც 13 ივნის საღამოს ვაკე-საბურთალოს გზაზე დატრიალდა. არ იქნა აღდგენილი სურათი იმ ადამიანების მიერ, რომლებიც უშუალოდ იქ იმყოფებოდნენ, სწორედ ამიტომ გულგრილობის გამო მივმართავთ თხოვნით იმ ადამიანებს, მოვიდნენ და გაიხსენონ, თუ ვინ როგორ დააღწია თავი და ვინმეს ხომ არაფერი შეუნიშნავს ისეთი, რაც ჩვენთვის ხელჩასაჭიდი იქნება იმისთვის, რომ ვიპოვოთ ჩვენი ოჯახის წევრი.
შევიკრიბებით მზიურის ტერიტორიაზე 23.07.2015 19:00 სთ.
მადლობა ყველას ყურადღებისთვის" - ნათქვამია ოჯახის განცხადებაში.