საზოგადოება "უფასო ტაქსის" მძღოლის ფასიანი სამსახური 2015, 21 ივნისი, 1:00 ![]() დღეს თბილისის მერმა დავით ნარმანიამ გიორგი ლომიძე ნაძალადევის რაიონის გამგეობაში თავად მიიყვანა და გამგებელ ზაზა გაბუნიასთან ერთად სამუშაო გარემო დაათვალიერებინა. თბილისის მერის, დავით ნარმანიას განცხადებით, გიორგი ლომიძე ნაძალადევის რაიონის სპეციფიკას კარგად იცნობს და მის მიერ გაწეული სამსახური ქალაქისთვის სასარგებლო იქნება „გუშინ საღამოს ჩვენს საგანგებო შტაბში შევხდი მას. ვისაუბრეთ ამ საკითხთან დაკავშირებით, ჩვენთან ერთად იყო ნაძალადევის რაიონის გამგებელიც. მან გამოთქვა მზაობა გიორგის მონიტორინგის სამსახურში დასაქმებასთან დაკავშირებით, რადგან ის კარგად იცნობს რაიონის სპეციფიკას . გიორგი დღეიდან სწორედ აქ შეუდგა მუშაობას. ის მიხედავს ნაძალადევის რაიონს, გვერდში დაუდგება ჩვენს გამგეობას და გააკეთებს ქალაქისთვის კარგ საქმეს“, - განაცხადა დავით ნარმანიამ. ნაძალადევის რაიონის გამგებელმა ახალ თანამშრომელს დეტალურად აუხსნა თუ რა შევა მის ფუნქციაში და როგორი გრაფიკით მოუწევს მუშაობა. „ნაძალადევის რაიონში აქტიური სამუშაოები ძალიან ბევრ ადგილზე მიმდინარეობს. გიორგის ენერგია და მისი შრომისმოყვარეობა გამგეობას ძალიან გამოადგება. მისი ძირითადი ფუნქცია ამ სამუშაოების მეთვალყურეობა და მონიტორინგი იქნება . ასევე მის ფუნქციაში შევა სამუშაოების შესახებ ინფორმაციის შეგროვება, კონტრაქტორ კომპანიებზე დაკვირვება . ეს ყველაფერი გამგეობის გამართული ფუნქციონირებისთვის ძალიან მნიშვნელოვანია“, - განაცხადა ნაძალადევის რაიონის გამგებელმა, ზაზა გაბუნიამ. გიორგი ლომიძის თქმით, მის დასაქმებასთან დაკაშირებით მიღებული გადაწყვეტილება მოულოდნელი იყო. „სტიმული მომცეს იმ ბავშვებმა, რომლებიც ყელამდე ტალახში მუხლჩაუხრელად შრომობდნენ და ერთდერთი, რაც შემიძლია ვთქვა არის ის, რომ ძალიან ბევრი მოხალისე მძღოლი შემოგვიერთდა. პირველ რიგში მთავარია, რომ საქმე გაკეთდა და ვეხმარებით მათ, ვინც თავად დაზარალებულ მოსახლეობას უწევს დახმარებას“, - განაცხადა გიორგი ლომიძემ. გიორგი ლომიძის დასაქმების ინიციატივით პრემიერ-მინისტრმა ირაკლი ღარიბაშვილმა თბილისის მერს რამდენიმე დღის წინ მიმართა. გიორგი ლომიძე 24 წლისაა და მშობლებთან ერთად ცხოვრობს. ![]() ![]() ![]() 269 5-ს მოსწონს
|