ამ ცოტაოდენი ხნის წინ უამრავი ინტერნეტ-ფორუმი და საიტი დაიპყრო მცენარის ფოტოსურათებმა, რომლის ყვავილსაც შიშველი ქალის სხეულის ფორმა აქვს. მცენარეს Narilatha ჰქვია და სამხრეთ-აღმოსავლეთ აზიაში იზრდება, კერძოდ ჰიმალაიში, ინდოეთში, შრი-ლანკასა და ტაილანდში. ყვავილობს ოც წელიწადში ერთხელ და მისი ყვავილები ძალიან ჰგავს ქალის მშვენიერ სხეულს.

აღმოჩნდა, რომ ეს მორიგი ხუმრობა იყო, რომელმაც ძალიან ააღელვა მებაღეები და ბუნებისმეტყველები მსოფლიოს სხვადასხვა ქვეყნიდან.

თუმცა უნდა აღინიშნოს, რომ ამ ხუმრობას თავისი ისტორია და ფესვები აქვს. კერძოდ, Narilatha-ს შესახებ ინფორმაციის ძებნისას ინტერნეტში წავაწყდი ცნობებს, რომ სამხრეთ-აღმოსავლეთ აზიის ქვეყნებში (ინდოეთი, შრი-ლანკა, ტაილანდი) არსებობდა უამრავი ძველი ლეგენდა და მითი ქალი-მცენარეების ნაყოფის არსებობის შესახებ, ან პირიქით, მცენარეების შესახებ, რომლებიც ქალის ფორმის ნაყოფს ისხამდნენ.

ლეგენდის არსი შემდეგშია: ამ ქვეყნებში უამრავი მონასტერი იყო, რომლებშიც ბერები ცხოვრობდნენ. მათ აკრძალული ჰქონდათ გარესამყაროსთან და მით უმეტეს, ქალებთან კავშირი, მაგრამ ადამიანის სხეულის ბუნება ხშირად იმარჯვებდა ფილოსოფიურ სწავლებებზე და ოკულტისტურ რიტუალებზე და აი, ხეებზე გაჩნდა ქალის ფორმის ნაყოფი, რომელსაც ბერები წყვეტდნენ, ხოლო შემდეგ.... ფანტაზიები თქვენთვის მომინდია.

სხვადასხვა წყაროებში ნაჩვენებია გრავიურები და ნახატები ამ უცნაური ხეების გამოსახულებით. აი რამოდენიმე მათგანი.

დაბოლოს, გთავაზობთ ვიდეოს, რომელიც ტაილანდის ტელევიზიით გავიდა და რომელიც მოგვითხრობს ამ საოცარი მცენარის შესახებ. როგორც მოგვიანებით აღმოჩნდა, სიუჟეტი უბრალოდ საპირველაპრილო ხუმრობას წარმოადგენდა.