იური ვაზაგაშვილი - ზურა ვაზაგაშვილის მამა საკუთარი შვილის საფლავზე ყვავილების დაწყობის დროს აფეთქდა.

გიორგი ვაზაგაშვილის - გარდაცვლილის ძმისწულის განცხადებით, სავარაუდოდ, ასაფეთქებელი მოწყობილობა სწორედ ყვავილების ლარნაკში იყო ჩამონატაჟებული. მან ასევე აღნიშნა, რომ იური ვაზაგაშვილი საფლავზე მარტო იმყოფებოდა. გარდაცვლილის ძმისშვილის ინფორმაციით, აფეთქების ადგილზე ამ დროისთვის მობილიზებული არიან სამართალდამცავები.

ვაზაგაშვილების ადვოკატი, გაგი მოსიაშვილი თვითმკვლელობის ვერსიას გამორიცხავს . ის აცხადებს, რომ საფლავი, სავარაუდოდ, დანაღმული იყო.

“გამორიცხულია იურის თავი აეფეთქებინა, სავარაუდოდ, საფლავი დანაღმული იყო, რადგან, როგორც ახლა მითხრეს, ყვავილები დაალაგა თუ არა, აფეთქება ზუსტად იმ დროს მოხდა. დარწმუნებული ვარ, იური ვაზაგაშვილი თავს არ აიფეთქებდა. ჩვენ წინა დღეებში გვქონდა საუბარი და დავსახეთ სამომავლო სტრატეგია მისი ვაჟის, ზურა ვაზაგაშვილის საქმესთან დაკავშირებით. მას ჰქონდა სერიოზული გეგმები სამართლებრივი ბრძოლის კუთხით”, – აცხადებს ადვოკატი.