საერთაშორისო ჰ.ს-ის საფუძველია ჟენევაში 1864, 1906, 1929 და 1949 წელს დადებული მრავალმხრივი საერთაშორისო შეთანხმებები, აგრეთვე ჟენევის მეოთხე კონვენციის თანდართული 1977 წლის ორი დამატებითი პროტოკოლი. ჟენევის ყველა მრავალმხრივი კონვენცია ომის წარმოების ჰუმანიტარულ წესებს განსაზღვრავს, რომელიც, პირველად, 1864 წელს შეიქმნა წითელი ჯვრის ინიციატივით (ამიტომ ამ კონვენციებს წითელი ჯვრის კონვენციებსაც უწოდებენ). ჰუმანიტარული სამართალი საერთაშორისო და შიდა ომების წარმოების წესებს განსაზღვრავს და აწესებს ნორმებს, რომლებიც ჯარისკაცების, სამოქალაქო პირების და სხვათა სიცოცხლის საკითხებს ეხება.