13 ივლისს ერნე რუბიკს-მსოფლიოში ყველაზე პოპულარული თავსატეხის-რუბიკის კუბიკი გამომგონებელს 69 წელი შეუსრულდა.

გასული საუკუნის 70-80-იან წლებში მილიონობით ადამიანს მთელ მსოფლიოში ღამეები არ ეძინა და ხელიდან არ უშვებდა ამ "მრავალფეროვან" კუბიკს. ერნე რუბიკი მხოლოდ გამომგონებელი არაა, ის სკულპტორი და უნივერსიტეტის პროფესორია, სხვათაშორის კუბიკი თავიდან, როგორც სასწავლო თვალსაჩინოება ისე შეიქმნა.

გამოგონება 1975 წელს დაპატენტდა და პირველად მას ერთი პატარა კოოპერატივი უშვებდა ბუდაპეშტში. 1980 წლის მაისში კუბიკის მილიონიანმა პარტიამ როგორც იქნა ჩააღწია ამერიკაში, მისი პრემიერა შედგა ჰოლივუდში 5 მაისს. სათამაშოს წარმოების ლიცენზია იყიდა კომპანიამ Ideal Toy Corporation და მანვე მისცა ეს დასახელება-Rubik's Cube(რუბიკის კუბი). შემდგომში ეს დასახელება მთელ მსოფლიოზე გავრცელდა, თუმცა უნგრეთში, გერმანიაში, პორტუგალიაში, ჩინეთში მას "მაგიურ კუბს" ეძახიან, ხოლო ივრითულად "უნგრულ კუბს".

1982 წელს ბუდაპეშტში ჩატარდა პირველი მსოფლიო ჩემპიონატი რუბიკის კუბის აწყობაში, გამარჯვებული გახდა ვიეტნამური წარმოშობის ამერიკელი სტუდენტი მინ ტაი, რომელსაც მხოლოდ 23 წამი დაჭირდა.

დღეისათვის ეს რეკორდი ჰოლანდიელ ერიკ აკერსჯიკს ეკუთვნის და ის 7, 08 წამია. სხვათაშორის თვითონ რუბიკმა ვერაფრით მოახერხა ამ თავსატეხის ერთ წუთზე ნაკლებ დროში აწყობა.

ინგლისელი ფსიქიატრების დაკვირვებით ადამიანებს რომლებიც ვერ ახერხებდნენ რუბიკის თავსატეხის აწყობას ბრაზდებოდნენ და მისი დამტვრევის სურვილი უჩნდებოდათ. ზუსტად ასეთი არამყარი ფსიქიკის ადამიანებისთვის გამოუშვეს პლასტმასის ნაჯახები, რომლებიც კუბის "დასასჯელად" გამოიყენებოდა.

30 წლის მანძილზე გაიყიდა 350 მილიონზე მეტი "რუბიკის კუბი", რამაც იგი ყველა დროის ყველაზე გაყიდვად სათამაშოდ აქცია მთელ მსოფლიოში, მისი გამომგონებელი კი- მაშინდელი სოციალისტური ბანაკის ქვეყნების პირველ ოფიციალურ მულტიმილიონერად.

დღეისათვის ერნე რუბიკი მეუღლესა და ოთხ შვილთან ერთად ბუდაპეშტის გარეუბანში ცხოვრობს, მონაწილეობს ვიდეო თამაშების შექმნაში, წერს სტატიებს არქიტექტურაზე და რუბიკის სტუდიის ხელმძღვანელია. ჩრდილში ცხოვრებას ამჯობინებს და კატეგორიულად არ ურთიერთობს ჟურნალისტებთან.