სულ რაღაც ორი დღის წინ "საქართველოს ვარსკვლავის" გამარჯვებული ნინა სუბლატი გახდა, რომლის ნიჭიერებაში ეჭვი არავის შეჰპარვია.სამი თვის განმავლობაში ნინა არა მარტო თავისი ვოკალური ნიჭით გამოირჩეოდა, მან მოახერხა მაყურებლის განსაკუთრებული ყურადღება თავისი ექსტრავაგანტული და ინდივიდუალური ჩაცმის სტილითაც მიეპყრო.ნინა ნამდვილად იყო კონკურსის ფავორიტი კონკურსანტი, (როგორც მას თავად ჟიურის წევრები უწოდებდნენ და მსოფლიო დონის ვარსკვლავად გახდომას უწინასწარმეტყველებდნენ).

სამი თვის განმავლობაში ყურადღების ცენტრში იყო მოქცეული მისი შარმი და ქარიზმატულობა, დიდი სცენისთვის დამახასიათებელი თავისუფალი და თამამი ჩაცმულობა.მისი გამოსვლა ყოველთვის იყო დასამახსოვრებელი არა მარტო საუცხოო ხმის ტემბრით, არამედ ჩაცმის ორიგინალური სტილითაც. ნინა სუბლატი ქართველმა მაყურებელმა აირჩია და პროექტის გამარჯვებულად გამოაცხადა და არა "ტელევიზია რუსთავი 2 "-ის გამარჯვებულად, როგორც მომღერალმა ეკა კვალიაშვილმა შეაფასა პროექტის საბოლოო შედეგები.მოგეხსენებათ, ეკა კვალიაშვილი პროექტის კიდევ ერთი ფინალისტის ნუკა გვალიას დედა გახლავთ.აღნიშნულის შესახებ მან საკუთარ ფეისბუქის გვერდზე წერილი გამოაქვეყნა, სადაც თითქოსდა დასცინა ნინო სუბლატს.წერილის ტექსტი კი ასეთია: - " ნუკ, შენ მთელ საქართველოს უყვარხარ და ძალიან მალე მსოფლიო შეგიყვარებს...შენ დიდი მომღერალი ხარ, მე კმაყოფილი ვარ, რომ ამ პროექტში შენ კარგი პრაქტიკა გაიარე, გამოცდილება მიიღე, დაიხვეწე და უკვე მზად ხარ უმაღლესი მწვერვალების დასაპყრობად...ნინას კი ვულოცავ ტვ.რუსთავი 2 - ის ვარსკვლავობას..." -აი ასე მიმართა მომღერალმა ეკა კვალიაშვილმა საკუთარ ქალიშვილს ფეისბუქის მეშვეობით და ნინას კი "ტვ.რუსთავი 2 - ის ვარსკვლავი" უწოდა.

და მაინც, რაც არ უნდა თქვას პროექტის შედეგებით უკმაყოფილო საზოგადოების ერთმა ნაწილმა, ნინა სუბლატი მაინც საუკეთესოთა შორის საუკეთესო და ამ პროექტის ერთადერთი ფავორიტი იყო, რამაც საბოლოო შედეგებზეც ობიექტურად ჰპოვა ასახვა.