კერპების და კარდინალების ძიება უკვე ათწლეულებია ქართულ პოლიტიკური პროცესების განუყოფელია. „ქართული ოცნების" ხელისუფლებაში მოსვლის შემდეგ ახალ რუხ კარდინალად გია ხუხაშვილი მონათლეს, რომელიც პრემიერმინისტრ ბიძინა ივანიშვილის მრჩევლად ეკონომიკური განხრით უკვე ოფიციალურადაც დაინიშნა.
„უპორთველო პრემიერი", „წმინდა ხუხა", „ხუხოფობია"... ეს არასრული ჩამონათვალია იმ ტერმინებისა, რომელსაც პრემიერის მრჩევლის მისამართით გაიგონებთ.
უმცირესობის „ენაკვიმატმა" დეპუტატმა გოგა ხაჩიძემ პარლამენტის ტრიბუნიდან ხუხაშვილის ოდიოზურობაზე საუბრისას ახალი ფრთიანი ფრაზაც უმალ მოიფიქრა :" მალე კარზე მოგვიკაკუნებენ და გვეტყვიან, გინდათ გესაუბროთ ჭეშმარიტ ხუხაშვილზე"- იხუმრა დეპუტატმა, რასაც დარბაზში ოპოზიციის გამხიარულება მოჰყვა, საზოგადოებაში კი აქტუალური საუბრები „ჭეშმარიტ ხუხაშვილზე".
geotimes.ge „ჭეშმარიტების დასადგენად" გია ხუხაშვილს სახლში ესტუმრა, სხვათაშორის პრემიერის მრჩეველს სახლის კარებზე მივუკაკუნე და შესვლისთანავე მოურიდებლად ვკითხე:
– გვინდა გვესაუბროთ ჭეშმარიტ ხუხაშვილზე?
-ჭეშმარიტ ხუხაშვილზე სხვები საუბრობენ, მაგრამ მობრძანდით, ვისაუბროთ ჭეშმარიტებაზე. (ეღიმება)
-ბატონო გია, თქვენ რუხ კარდინალობაზე მითქმა-მოთქმა არ წყდება, უკვე პრემიერმა ოფიციალურად წარგადგინათ მრჩევლად, მაგრამ როგორც ჩანს ამანაც არ გამოიღო შედეგი...
-ეტყობა დამახასიათებელია ეს ჩვენთვის. პრინციპში ამას თავისი ობიექტური მიზეზები ქონდა: ერთის მხრივ, როცა ხელისუფალთან ხარ საკმაოდ ახლოს და რაღაცაში მონაწილეობ, მეორეს მხრივ - შენი იდენტიფიცირება ვერ ხერხდება, (იმიტომ რომ არ გაქვს თანამდებობა და თავისუფლებას ინარჩუნებ) ეს ძალიან ძნელი გასაგებია საზოგადოებისთვის. მერე იქმნება ლეგენდები. მრჩევლად დანიშვნის გადაწყვეტილებაც ამიტომ მიიღო პრემიერმა. საზოგადოებას სჭირდება, რომ თუნდაც მეგობრული ურთიერთობა გქონდეს ხელისუფალთან, ამისათვის თავისუფლება უნდა დაკარგო. პრინციპში საზოგადოების ეს მოთხოვნა შევასრულეთ.
- და მაინც ისმის კითხვა, ვინ არის ხუხაშვილი? და უამრავ რამეს მოგაწერენ?
-აქედან საერთოდ არაფერია რეალობა. რაც შეეხება იმას, რომ „ნაცმოძრაობა" გააქტიურდა ამ ბოლო დროს ჩემთან მიმართებაში მომწონს და მსიამოვნებს კიდევაც. მისი „ღირსეული" წარმომადგენლები, მათ შორის პარლამენტის ტრიბუნას იყენებენ ჩემ პერსონაზე სასაუბროდ, ეს ნიშნავს, რომ ისინი ჩემში ხედავენ პრობლემას და ეს საამაყოცაა ჩემთვის. სხვათაშორის ტერმინებს, რომლებსაც ხმარობენ, ბევრს ჩემგან იღებენ, ბიზნესმენების აღსარების ჩაბარება, თავის დროზე ფიგურალურად ვიხმარე და აიტაცეს. ტერმინი „ხუხაფობიაც" მე მეკუთვნის. მერე სხვებიც ავითარებენ ჩემ „შემოქმედებას".
-აღსარების რა გითხრათ, მაგრამ ცეზარ ჩოჩელი მის მიმართ დაწყებულ სამართლებრივ დევნაში თქვენ გადანაშაულებთ, რადგან როგორც ამბობს, სწორედ თქვენ მიერ გამოთქმული ბრალდებების შემდეგ დაინტერესდა პროკურატურა მისი საქმიანობით...
-ეს არის არასწორი და პირდაპირ გეტყვით ტყუილია, მის თემებზე ხუხაშვილს არ დაუწყია საუბარი. რომ მაბრალებს უნდა დაასაბუთოს როდის ვთქვი და რა ვთქვი. ჩოჩელის თემაზე ლაპარაკობდა (მერე მოვიძიე) კოკა გუნცაძე. კოკა საუბრობდა „რკინიგზის შპალების ქარხნის შესახებ". რა თქმა უნდა, ეს თემა ვიცი, საქმის ყურში ვარ, ვინაიდან რკინიგზის მრჩეველი ვარ. ჩოჩელმა შექმნა შთაბეჭდილება თითქოს მე ვლაპარაკობდი ამაზე, ეს არავის არ დაუდასტურებია. არადა ამაზე ააგო მთელი თავისი თეორია. რატომ დასჭირდა ხუხაშვილის ხსენება გასაგებია. კოკა გუნცაძე არ იყო მისთვის საკმარისი ავტორიტეტი და რადგან ხუხაშვილის თემა ისედაც აქტუალური იყო, მან გადაწყვიტა არაკეთილსინდისიერად, ამ თემაზე მიბმა. თუმცა, ესეც არ არის პრობლემა, რადგან იმ კონკრეტულ თემაზე, რა დავაც მიდის მასთან, „რკინიგზის შპალების ქარხანაზე „ აქ არის ძალიან სერიოზული პრობლემა, რაც მან გააკეთა არის რუსული ტიპის პრივატიზაცია. ეს იყო რკინიგზის ქონება.
-თუმცა ჩოჩელი ამბობს, რომ თუ რაიმე არასწორად მოხდა, პასუხი მაშინდელ ეკონომიკის მინისტრს უნდა მოეთხოვოს...
-ის რას ამბობს მე არ მაინტერესებს, მაგრამ ეკონომიკის მინისტრის მოადგილე იყო ზუსტად იმ გუნდის წევრი, ვისი მეგობარიც, როგორც თვითონ ადსტურებს, თვითონ იყო, ანუ ვანო მერაბიშვილის. მისი კუდიც და ეკონომიკის მოადგილის კუდიც მიდის ერთ კაცთან ვანო მერაბიშვილთან და შესაბამისად ანუ სამ კაცში უნდა გაირჩეს. ჩოჩელის იდეას, რომ მაშინდელმა სამინისტროს ხელმძღვანელობამ გასცეს პასუხი შესაბამის სტრუქტურებს, მივესალმები და სოლიდარული ვარ. მაგრამ ეს იმას არ ნიშნავს, რომ ესეთი ტიპის პრივატიზების შემთხვევაში არ უნდა აღდგეს სამართლიანობა. სახელმწიფოს, რკინიგზას, უნდა დაუბრუნდეს თავისი კუთვნილი ქონება და არა ხუხაშვილს.
თუ გინდათ რეალურად გეტყვით, ძალიან მარტივი ოპერაციაა რაც მოხდა, რკინიგზისვე ფულით იყიდეს რკინიგზის ქონება. ასე ხდებოდა პრივატიზაცია რუსეთში 90-იან წლებში. ზუსტად მსგავსი სქემით, ვანო მერაბიშვილის პირდაპირი მონაწილეობით და დახმარებით ჩატარდა ეს ოპერაცია. ისიც გასაგებია, რომ ჩოჩელს ლამაზი თვალებისთვის ამას არავინ არ გაუკეთებდა.
- მაგრამ ცეზარ ჩოჩელი ამტკიცებს, რომ ქარხნის აუქციონზე შესყიდვამდე შპალებზე რკინიგზის მიერ გამოცხადებული ტენდერი წააგო და რეალურად სახელმწიფოსგან დახმარება არ ჰქონია...
-სისულელეების ლაპარაკს და ამ რიტორიკას თავი გაანებოს, მას ტყუილად არავინ შეეხება. მითუმეტეს როდესაც ის სხვა საწარმოებს ახსენებს და ამასაც მე მიკავშირებს, ეს ჩემ კომპეტენციაში არ შედის.
რაც შეეხება იმას თუ რატომ არ მივედი მასთან შესახვედრად. გეტყვით რომ ჯანსაღად არ მიმაჩნია, როდესაც ადამიანზე მიდის ძიება და ამ დროს ის ხელისუფლებასთან აწარმოებს მოლაპარაკებებს. გამოძიება დასრულდეს, დავრწმუნდეთ ყველა, რომ ის არის წესიერი კაცი, ამის შემდეგ პრობლემა არაა. მაგრამ როდესაც ეჭვმიტანილს ელაპარაკები, ზუსტადაც ეგ დაბადებდა უფრო მეტ კითხვებს და გამოებმებოდა კუდი.
- სხვათაშორის, პრესკონფერენციაზე განაცხადა, კულუარული შეხვედრები არ მინდა, თორემ ამის შესაძლებლობა მაქვსო...
- ეგ არის ტყული, მას ძალიანაც უნდოდა, მაგრამ არავინ არ შეხვდა, ეს არის რეალობა რა. დაელოდოს გამოძიებას და მერე მეც შევხვდები და სხვაც.
-ბატონო გია, კოალიციის შიგნითაც არის თქვენთან მიმართებაში უკმაყოფილება, რუხ კარდინალად სავარაუდოდ მმართველ ძალაშიც გთვლიან...
-ეს ადამიანის ბუნებაა. საერთოდ სიძულვილის ხარისხი იზომება ხელისუფალთან სიახლოვით. სამწუხაროა, მაგრამ ძალიან ბუნებრივია, რომ ძალიან ბევრ ამბიციურ ადამიანს აწუხებს ჩემი სიახლოვე პრემიერთან. თუმცა ამას მშვიდად ვიღებ, არც ვბრაზდები, რადგან ეს არის ბანალური, მდაბალი, მაგრამ ადამიანური თვისება. ჩვენ ყველა ადამიანები ვართ და სისუსტეები გვახასიათებს, განსაუთრებით პოლიტიკოსებს ახასიათებთ ეს.
- ეკონომიკური სექტორის განუყოფელი ნაწილია სოფლის მეურნეობა, ის ღერძი, რაზეც სამომავლოდ უნდა დავდგეთ, ძალიან არასასიამოვნო რამ მოხდა ამ სამინისტროში, რასაც დავით კირვალიძის გადადგომა მოჰყვა, შესაძლოა მინისტრი დაბრუნდეს გამოძიების მერე სამინისტროში?
-მე ძალიან დიდი იმედი და სურვილი მაქვს კირვალიძე დაბრუნდეს. ჩემი აზრით, ის ძალიან ღირსეულად მოიქცა, როდესაც პოლიტიკური პასუხისმგებლობა აიღო. ეს ნიშნავს, რომ ის ჯანსაღად მოაზროვნე ადამიანია. ხელი კი არ შეახოცა - პასუხისმგებლობა იტვირთა. მე დიდი იმედი მაქვს, რომ ამ არასასიამოვნო ფაქტს ყველა გადავლახავთ. მე არ მინდა წინ გავუსწროთ მოვლენებს, თუმცა ჩემი ადამიანური სურვილია, ისე დამთავრდეს ყველაფერი დამნაშავეები თუ არიან დაისაჯონ და მინისტრი დაუბრუნდეს თანამდებობას.
- ირაკლი ალასანიაზეც მინდა გკითხოთ, მის საპრეზიდენტო კანდიდატად განხილვის ჩაშლასაც თქვენ მოგაწერენ, გულწრფელად ვთქვათ, საუბარი იმაზე, რომ მას საპრეზიდენტო ამბიციები ჰქონდა, ახალი დაწყებული არ ყოფილა, ჯერ კიდევ ბიძინა ივანიშვილის პოლიტიკურ პროცესებში ჩართვამდე სხვადასხვა წრეებში ალასანიას მომავალ პრეზიდენტობას წინასწარმეტყველებდნენ, ბიძინა ივანიშვილიც ამბობდა, რომ მას ქვეყნის მართვასაც კი ანდობდა...
-ირაკლი ავღანეთში გაემგზავრა და გზამშვიდობისა ვუსურვე. ჩვენ შორის არანაირი პრობლემა არ არის პირად ურთიერთობაში. რაც შეეხება მის კარიერულ სვლას, ირაკლი ახალგაზრდა კაცია, ყველაფერი წინა აქვს ჯერ. ვფიქრობ, რომ გამომდინარე პრეზიდენტის ახალი სტატუსიდან, რომელის მიხედვითაც ის აქტიური მენეჯერი არ არის სახელმწიფო მართვაში ირაკლისთვის ცოტაა. ირაკლი ჯერ კიდევ საჭიროა აქტიურ მენეჯმენტში. ძალიან სერიოზული ამოცანები დგას დღეს მის წინაშე და მისი ახალგაზრდული ენერგია საჭიროა სხვა მიმართულებით. მომავალ პრეზიდენტს ისეთი ფუნქციები აქვს, რომელიც ასოცირდება გარკვეულ გამოცდილებასთან, სიბრძნესთან, თუ გნებავთ გარკვეულ ასაკთანაც, ის კრიზისმენეჯერია და გართულებების შემთხვევაში, უნდა შეეძლოს და დამშვიდება, დაწყნარება. ირაკლის უდიდესი პოტენციალი აქვს, თვითონ თქვა ეს საკითხი რომ მოხსნა, რომ ჯარის მშენებლობას აპირებს უახლოესი 2 წელი.
-ბატონო გია, ორი წლის ხსენება ემთხვევა პრემიერის პოლიტიკიდან წასვლის სურვილის თარიღს, ირაკლი ალასანია ხომ არ შეიძლება გახდეს მომავალი პრემიერი?
-ირაკლი არის აქტიური პოლიტიკოსი, ერთ-ერთი ყველაზე წონადი ფიგურა საქართველოში, ასე რომ ირაკლის ნებისმიერ თანამდებობაზე უნდა ჰქონდეს ამბიცია. ეს სწორიც არის, ის არის პოლიტიკოსი, ერთადერთი ბიძინა ივანიშვილია, რომელსაც ეს ამბიცია არ აქვს და მისთვის პოლიტიკა არ არის ბუნებრივი მდგომარეობა.
-ამაში გავხართ, ერთმანეთს...
-ხო, თუმცა მე მეტი კომფორტი და თავისუფლება მაქვს ამ მხრივ, თავიდან როცა პროცესი იწყებოდა, ვთქვი რომ ციკლის დამთავრების შემდეგ, გავდგებოდი გვერდზე. ასეც მოვიქეცი და პირდაპირ გეტყვით, ცუდად გამომივიდა. რადგან ურთიერთობები გრძელდებოდა და სწორედ ამან წარმოშვა მითები ჩემს შესახებ. მე გადაწყვეტილებების მიღებაში არ ვმონაწილეობდი და არც ახლა ვმონაწილეობ, მაგრამ ამას საზოგადოება ძნელად იჯერებს. არ დავმალავ, პრემიერთან ბევრ თემაზე ვსაუბრობ, მათ შორის სახელმწიფოებრივ საკითხებზე. მაგრამ ეს არის უბრალოდ საუბრები.
-საპრეზიდენტო ასაკი ახსენეთ, ირაკლი ალასანია თუ ახალგაზრდაა, გამოდის კანდიდატი შედარებით ასაკოვანი იქნება?
-მოხუცსაც არ ვგულისხმობ...
-ისე, ვიცეპრემიერ გიორგი მარგველაშვილის შესაძლო კანდიდატობაზეც არის საუბარი...
-რომც ვიცოდე არ გეტყოდით, ეს ჩემი პრეროგატივა არ არის. თუმცა მარგველაშვილიც ერთ-ერთი ღირსეული კანდიდატი იქნებოდა...
- ნატოში შესვლასთან დაკავშირებით, ახალი რეფერენდუმის ჩატარების იდეა რატომ დაგაბრალეს?
-ეს იყო წარმოუდგენელი თავხედობა, „ნაციონალური" მედია სრულ დეზინფორმაციაზე წავიდა. ჟურნალისტის კითხვა იყო გამოყვანილი ჩემ პასუხად, ეს კითხვა დამისვა ჟურნალისტმა და მე უარვყავი. ჩვენი არჩევანი დადასტურებულია ხალხის მიერ. იმიტომ კი არა, რომ გვიყვარს ან არ გვიყვარს ნატო, უბრალოდ ეს ობიექტური აუცილებლობაა, თავდაცვისთვის ჩვენ სხვა უსაფრთხოების სისტემისკენ ვერ წავალთ. ამის კითხვისქვეშ დაყენება დღევანდელ მოცემულობაში უაზრობაა.
ასევე კონტექსტიდან ამოღებული იყო ჩემი ნათქვამი, რომ რუსების მოსაწონი პრეზიდენტი უნდა გვყავდეს. რაც ჩემთან მიმართებაში ხდება, ეს არის შავი პიარის კლასიკური მაგალითი. ეს არ იყო „საქართველო და მსოფლიოსგან" წამოსული შავი პიარი, პირველ რადიოში მოხდა ინფორმაციის ფალსიფიცირება, მოდელირებული ქრონიკის ატორის მათე კირვალიძისგან ეს არაა გასაკვირი. 9 წელი ამით იყვნენ დაკავებული და ახლაც ასე თავხედობენ. ნატოზე უამრავი კომენტარი გამიკეთებია და სულ სხვა რამეს ვამბობდი და როგორ გავგიჟდი ერთ დღეს და საწინააღმდეგოს ლაპარაკი დავიწყე?
-ხშირად, თქვენ და ლაშა ნაცვლიშვილის ტანდემს, ბრალს პროკურატურის კონტროლშიც გდებენ...
- ჟურნალისტების გარკვეული კატეგორია, ნათელმხილველის ნიჭით არიან დაჯილდოებულები. მე და ლაშა ნაცვლიშვილი მართლაც მეგობრები ვართ, მაგრამ მეგობრობა არ ნიშნავს იმას, რასაც ისინი ფიქრობენ და რასაც წერენ. მე არასოდეს თავს უფლებას არ მივცემ ლაშას საქმიანობაში ჩავერიო. ადამიანები ასე აზროვნებენ, თუკი გაქვს საშუალება რატომ არ უნდა გამოიყენო. ჩემს მეგობარს, ზუსტად იმიტომ რომ მეგობარია, არ ვაკადრებ იმას, რომ მის საქმეში ხელი ვაფათურო. ასე იქცევიან ჯანსაღი ადამიანები. საერთოდ, ყველა ადამიანი თავისი გარყვნილების ხარისხის მიხედვით აწყობს თეორიებს.
-თუმცა თქვენი ნათქვამი, რომ ცოტა კიდევ უნდა მოვითმინოთ სამართლიანობის აღდგენის გზაზე, ემთხვევა პროკურატურის უმოქმედობას, რაც სხვათაშორის „ქართული ოცნების" რეიტინგზე სახარბიელოდ არ აისახება...
-შეიძლება ემთხვევა, მაგრამ ეს არის ჩემი, როგორც ერთი ადამიანის მოსაზრება, პოლიტიკური ლოგიკით მივდივარ და მეტი არაფერი. თუ ლოგიკას მივყვებით და ანალიზს გააკეთებთ, ისიც დაემთხვევა. სანამ არ იქნება თავისუფალი მართლმსაჯულება, მანამდე ვხედავთ, რომ უშედეგოა სამართლიანობის აღდგენის მცდელობა. საზოგადოებაში ნიჰილისტური, სკეპტიკური დამოკიდებულება მართლაც იზრდება. საზოგადოებას ძალიან სწრაფად უნდა სამართლიანობის აღდგენა და როცა შესაბამის ტემპს ვერ ხედავს ღიზიანდება. მაგრამ არსებობს სახელმწიფო ინტერესი, სადაც ძალიან ბევრი ფაქტორის გათვალისწინება გიწევს და ამ კუთხით მე ვფიქრობ სახელმწიფო მაინც სწორად იქცევა, თუნდაც საკუთარი რეიტინგის დანაკარგის ხარჯზე. აი ესაა სახელმწიფოებრივად აზროვნება. პრეტენზიების წაყენებაზე ადვილი არაფერი არ არის, მაგრამ არ უნდა დაგვავიწყდეს, რომ არ გამოჩენილიყო ბიძინა ივანიშვილი, საზოგადოებას კიდევ დიდხანს მოუწევდა იმ რეჟიმის პირობებში ცხოვრება. ასე, რომ ცოტახანს კიდევ ვიყოთ დაძაბულები და დაველოდოთ მოვლენების განვითარებას. სამართლიანობა აუცილებლად აღდგება, ეს გარდაუვალია.
- სხვათაშორის ბრალდებების ნაწილი, რომელიც ბაჩო ახალაიას წაუყენეს ძალიან სუსტია, პროკურატურას მტკიცებულებების მოპოვება უჭირს, თუ ამბობთ რომ ადამიანებს გაზვიადება გვიყვარს, იქნებ ახალაიაც არ იყო ისეთი „მონსტრი", როგორც წარმოაჩენდნენ...
-საბოლოო ჯამში ვერდიქტი გამოაქვს გამოძიებას და გადაწყვეტილებას იღებს სასამართლო. მხოლოდ შემიძლია მქონდეს მოსაზრება, მაგრამ ეს არაფერს არ ნიშნავს. მე შემიძლია უფრო ფუნდამენტურ საკითხებზე, მსოფმხედველობრივ საკითხებზე ვისაუბრო. მისი დანაშაულის ხარისხი არის სამართლის საქმე და არა ხუხაშვილის და რაიმე პროგნოზების. თუმცა გეტყვით ჩემს დამოკიდებულებასაც, ვთვლი, რომ მას ბევრი აქვს დაშავებული. ამასთანავე, ფართო გაგებით, დათა და ბაჩო ახალაიები მიმაჩნია რეჟიმის მსხვერპლად. ისინი არ არიან ძირითადი დამნაშავეები, რადგან დამკვეთი იყო სხვა. ისინი არ იყვნენ ამ რეჟიმის იდეოლოგები, ამიტომ მათი დანაშაულის ხარისხიც მიმაჩნია, რომ უფრო ნაკლებია, ვიდრე დამკვეთების. რომ არ ყოფილიყო მსგავსი დაკვეთა, ახალაიებს შესაძლოა სულ სხვა ცხოვრებით ეცხოვრათ.
-სხვათაშორის, ვანო მერაბიშვილს „ნაციონალთა" ერთ-ერთი იდეოლოგი თეა თუთბერიძეც დებს ბრალს, თან რუსეთის სპეცსამსახურებთან კავშირში...
-არ მინდა შეთქმულების თეორიას მივყვე, მაგრამ რასაც თეა ამბობს ლოგიკურია, არსებობს ბევრი სიმპტომი. მე ვერ დავადებ ხელს და ვერ დავადანაშაულებ, ეს თეორიაა რასაც დამტკიცება სჭირდება და ძიების საგანია.
-როგორც ჩანს, პრეზიდენტს რამდენიმე ერთგული ადამიანი შერჩა და მას პარტიის შიგითაც აღარ უსმენენ...
-ამას დიდი ანალიზი არ უნდა, ის ფაქტიურად მარტო დარჩა. ჩემის აზრით, ის არის დრამატული, ტრაგიკული პიროვნება, სხვათაშორის ამას დიდი ხანია ვამბობ. მისი ცხოვრებაა ყოვლისმომცველი შიში, შიშია მისი მეგზური და ეს ჩანს ყველა მის გამოსვლაში, მის კომენტარში. ძალიან რთულია შიშში ცხოვრება, მე დარწმუნებული ვარ, რომ ღამე კოშმარები აქვს, დღე ისტერიულია. ხან ველოსიპედიდან გადმოვარდება...
- ერთ-ერთი ვერსიით თურქეთში სცემეს პრეზიდენტი..
-ჯობდა ბავშვობაში ეცემათ ცოტა მეტი, იქნებ ასეთი არ გაზრდილიყო.
-აღზრდის ასეთ მეთოდებს მიესალმებით?
-ხო, ცოტა წაეტყაპუნებინათ. (იცინის)
- ბატონო გია, „საერთაშორისო გამჭვირვალობა საქართველომ" გამოაქვეყნა კვლევა, რომლის მიხედვითაც ინვესტიციების შემოდინება ქვეყანაში საგრძნობლად შემცირებულია, თქვენ როგორც პრემიერის მრჩეველს ეკონომიკური განხრით, როგორ გესახებათ სიტუაციის გამოსწორება?
-ამას აქვს თავისი ობიექტური მიზეზები, საინვესტიციო დაძაბულობა გარდამავალ პერიოდში გარდაუვალი იყო. როდესაც სისტემური გადასვლა ხდება ახალ რეჟიმზე ეს არაა გასაკვირი, ეს არის მოკლევადიანი რისკი. უახლოეს 3-4 თვეში, მას შემდეგ რაც თანაინვესტირების ფონდების ფორმირება მოხდება, ეს იქნება პირდაპირი სტიმული ეკონომიკის განვითარების და პროცესი ძალიან სწრაფად დაიძრება.
-რაც შეეხება ქართულ წარმოებას?
-ჩვენ უნდა ვიყოთ ამის ლობისტები, რაღაცნაირად უნდა მოვახერხოთ ეკონომიკური საზღვრის კონტროლი, რომ იმპორტ-ექსპორტის სალდო აღვადგინოთ. ჩვენ თუ არ განვავითარეთ შიგაწარმოება, ამ ქვეყანას არ აქვს არანაირი პერსპექტივა. ბრალს მდებენ ვიღაცეები, რომ იმპორტის ლობისტი ვარ, არადა ყოველთვის წარმოების ლობისტი ვიყავი. წარმოუდგენელი ცინიზმია, ამაზე წიგნი მაქვს დაწერილი. ცეზარ ჩოჩელს ჰგონია, რომ წარმოების მტერი ვარ, მას კი არ უყვარს წიგნის კითხვა, მაგრამ თუ სურვილი აქვს ჩემი წიგნი წაიკითხოს. მე ვიცი რომ მხოლოდ წარმოება შექმნის დამატებით ღირებულებას, სამუშაო ადგილს. გრძელვადიანი ეკონომიური სტაბილურობა, მხოლოდ ადგილობრივი წარმოების ხარჯზე შეიძლება.
-და ბოლოს, იმედზე ახალ გადაცემაში განსხვავებულ ამპლუაში გამოჩნდით, რამაც კიდევ უფრო გაამძაფრა კითხვა, ბოლოსდაბოლოს ვინაა ხუხაშვილი?
-ეს გარკვეულწილად ჩემი მინუსიცაა, მე არ მინდა ჩავიკეტო, არ არის ჩემთვის საინტერესო კარიერა და რაც მაინტერესებს მინდა ის გავაკეთო, რამდენზეც მყოფნის ენერგია ვცდილობ გავწვდე. ბევრი რამე მაინტერესებს და შესაბამისად, ბევრ რამეს მივედებ-მოვედები. ძალიან ბევრ შეცდომასაც ვუშვებ ადამიანურს ვაღიარებ, ნამდვილად არა ვარ უშეცდომო. ასე რომ, შემიძლია ხაჩიძეს ვუთხრა, რომ ჭეშმარიტი ხუხაშვილი ჩვეულებრივი მოკვდავია. შეიძლება მეტ-ნაკლებად ყურადღებას იმსახურებს, მაგრამ არა იმდენს, რომ პარლამენტის ტრიბუნიდან ნახევარი საათი დააკარგვინოს დეპუტატებს ჩემზე ლაპარაკით. რაც შეეხება გადაცემას, ძალიან მინდოდა მსგავსი გადაცემა ყოფილიყო ყოველთვის, ეს არის აბსოლუტურად არასტანდარტული სატელევიზიო ფორმატი. ამ გადაცემის მოკრძალებული ფუნქციაა, საზოგადოების როლის გაზრდა გადაწყვეტილების მიღებაში. ამ გადაცემაში იქნება სწორედ მიღებული გადაწყვეტილებები და შემდეგ მოვახდენთ ლობირებას, რომ ეს გადაწყვეტილება ხელისუფლებას მივაღებინოთ. საინტერესო პროცესები გველის ამ გადაცემასთან დაკავშირებით, ძალიან ბევრი მასალა იქნება სალაპარაკო, ხაჩიძეს ვპირდები, რომ არ მოვაწყენ.
მაკა დეკანოსიძე, geotimes.ge
