სამყაროს შთამბეჭდავი დაბადება ჰქონდა, მაგრამ როგორ დაასრულებს თავის არსებობას ის?

მეცნიერებმა შემოგვთავაზეს სამი შესაძლებლობა, რომელთაგან თითოეული ერთმანეთზე უარესია. ესაა ვარიანტები ცივი, ბნელი მარადისობიდან კოსმოსურ აფეთქებამდე, რომელიც ანადგურებს თავად სივრცეს.

აქ არის თავმოყრილი სამყაროს დასასრულის ყველაზე რეალური სამი სცენარი:

დიდი გამყინვარება

თუ ბნელი ენერგია გააგრძელებს თავის შეუნელებელ ზემოქმედებას, სამყარო სამუდამოდ გააგრძელებს გაფართოებას. ასეთ შემთხვევაში გალაქტიკები დაშორდებიან ერთმანეთს, ვარსკვლავები ჩაქრებიან და ყველაფერი ნელ-ნელა გაცივდება, სანამ აღარაფერი დარჩება სიბნელისა და სიცივის გარდა. ეს იქნება კოსმოსური სასაფლაო, სადაც ატომებიც კი ვერ შეიკავებენ ერთმანეთს. ეს არის ნელი, მშვიდი სიკვდილი და მეცნიერთა უმეტესობა ფიქრობს, რომ ეს ჩვენი სამყაროს ყველაზე სავარაუდო ბედია.

დიდი გასკდომა

მაგრამ რა მოხდება, თუ ბნელი ენერგია არ დარჩება მუდმივი? რა მოხდება, თუ ის გაძლიერდება?
ამ შემთხვევაში, გაფართოება უბრალოდ მხოლოდ კი არ გაგრძელდება, არამედ ის აჩქარდება მანამ, სანამ გალაქტიკები, პლანეტები და ატომებიც კი არ დაიშლებიან. ბოლო წამებში შავი ხვრელებიც კი აფეთქდებიან და თავად სივრცე გაირღვევა. ეს არის ყველაზე შემზარავი დასასრული, რომლის წარმოდგენაც კი რთულია.

დიდი დაჭმუჭვნა

ახლა წარმოიდგინეთ საპირისპირო სცენარი: რა მოხდება, თუ ბნელი ენერგია დასუსტდება და გრავიტაცია ხელახლა მოიპოვებს მასზე უპირატესობას?

ასეთ შემთხვევაში სამყარო შეწყვეტს გაფართოებას და დაიწყებს კოლაფსს. გალაქტიკები ერთმანეთს დაეჯახებიან, ტემპერატურა მოიმატებს და საბოლოოდ ყველაფერი ერთ, ცხელ, მკვრივ წერტილად გადაიქცევა, საიდანაც შესაძლოა ყველაფერი თავიდან დაიწყოს.

თითოეული ეს სცენარი ერთ რამეზეა დამოკიდებული, რაც ჩვენ ჯერ კიდევ ბოლომდე არ გვაქვს შესწავლილი და ესაა ბნელი ენერგია! სწორედ ის შეადგენს სამყაროს უმეტეს ნაწილს — და მაინც, მისი რაობა ჩვენთვის ჯერ კიდევ საიდუმლოდ რჩება.