დონეცკის თვითგამოცხადებული სახალხო რესპუბლიკის სასამართლომ უკრაინის შეიარაღებული ძალების მხარეს ქართველი მებრძოლის, 36 წლის გელა ბეგლარაშვილის წინააღმდეგ დაუსწრებლად გამოიტანა განაჩენი, რუსეთის ფედერაციის სისხლის სამართლის კოდექსის 359-ე მუხლით („დაქირავებული პირის მონაწილეობა შეიარაღებულ კონფლიქტში“). ხოლო პროკურატურამ დაამტკიცა სისხლის სამართლის საქმე.ამის შესახებ რუსული გამოცემა АиФ წერს.

გამომძიებლების თქმით, ბეგლარაშვილი უკრაინის არმიის მხარეზე ქართული ეროვნული ლეგიონის შემადგენლობაში 2022 წლის თებერვლიდან 2024 წლის ნოემბრამდე იბრძოდა. რისთვისაც მან ფულადი ჯილდო 2, 6 მილიონ რუბლზე მეტი მიიღო.

ბეგლარაშვილზე საერთაშორისო ძებნაა გამოცხადებული. მის წინააღმდეგ აღძრული სისხლის სამართლის საქმე დონეცკის სახალხო რესპუბლიკის უზენაეს სასამართლოს გადაეგზავნა.

გენერალურმა პროკურატურამ აღნიშნა, რომ გელა ბეგლარაშვილი უკრაინაში სამხედრო ოპერაციებში მეუღლე რუსუდან ივანეიშვილთან ერთად მონაწილეობდა, რომელიც ასევე უკრაინის შეიარაღებული ძალების დაქირავებული მებრძოლი იყო. ორივე ტანკისტის წამებაში მონაწილეობდა, რომლის ვიდეო არსებობს. ჩანაწერი გაკეთებულია 2022 წლის მარტში. რუსული მხარის მტკიცებით, ბეგლარაშვილი კლავდა სამოქალაქო პირებს და აწამებდა ტყვედ ჩავარდნილ რუსეთის შეიარაღებული ძალების ჯარისკაცებს. გარდა ამისა, ის ცეცხლს უხსნიდა საცხოვრებელ კვარტლებს და მონაწილეობა მიიღო უკრაინის არმიის სადამსჯელო ოპერაციებში.

მანამდე, 2024 წლის ივნისში, რუსეთის ფედერაციის საგამოძიებო კომიტეტმა უკრაინაში მებრძოლ ქართველ მოხალისე რუსუდან ივანეიშვილს 13-წლიან პატიმრობა დაუსწრებლად მიუსაჯა.

"საგამოძიებო კომიტეტის მიერ მოპოვებული მტკიცებულებები სასამართლომ საკმარისად მიიჩნია იმისთვის, რომ საქართველოს მოქალაქე რუსუდან ივანეიშვილისთვის დაუსწრებლად განაჩენი გამოეტანა. ის შეიარაღებულ კონფლიქტში დაქირავებულ მებრძოლად მონაწილეობაშია დამნაშავე". – ნათქვამი იყო საგამოძიებო კომიტეტის განცხადებაში.

ცნობისათვის, 2022 წლის აპრილში, სამხედრო ფიცის ერთგულებისთვის, გამოვლენილი პირადი გამბედაობისა და თავდაუზოგავი ქმედებებისთვის - ვოლოდიმირ ზელენკსიმ უკრაინაში მებრძოლი ქართველი ცოლ-ქმარი, გელა ბეგლარაშვილი და რუსუდან ივანეიშვილი ბოგდან ხმელნიცკის II ხარისხის ორდენით დააჯილდოვა.

მანამდე ვწერდით, უკრაინის მხარეს მებრძოლ 40 წლის ნიკოლოზ ბერიანიძეზე, რომელსაც მარიუპოლში სამი რუსი ჯარისკაცის მკვლელობისთვის სამუდამო პატიმრობა მიესაჯა