ჟურნალისტი ელისო კილაძე 26 ოქტომბრის საპარლამენტო არჩევნების შედეგებს შემდეგი შინაარსის პოსტით ეხმაურება და წერს:

"17 ოქტომბერს დავწერე სტატუსი, რომ ხმის მიცემის ფარულობა დაცული არ იქნებოდა (არც იყო, შავი მარკერით გაფერადებული რგოლი უკანა მხარეს ჩანდა), და გაყალბების ალბათობა იყო მაღალი !

პასუხად, გამომაცხადეს ქოცად, ბიძინას წისქვილის წყლად და მოღალატედ !

თქვეს რომ ელექტრონული არჩევნების კომპანიას უპირობოდ ენდობოდნენ!

იგივე ხალხი დღეს ამბობს, რომ არჩევნები გაყალბდა !

ყოველგვარი ნიშნისმოგების გარეშე, 26 ოქტომბრის ღამეს გეკითხებით, რას აპირებთ?

გისმენთ

P.s.ყველანი მახსოვხართ, მოთაგვა მეზარება"- ვკითხულობთ ელისო კილაძის პოსტში.

ცენტრალური საარჩევნო კომისიის მიერ 26 ოქტომბერს გამოქვეყნებული წინასწარი შედეგებით, პარტია „ქართული ოცნება“ ლიდერობს 52.99%-ით, ხოლო ოპოზიციურმა პარტიებმა, რომელთაც 5%-იანი ბარიერი გადალახეს, ჯამში 38.4% მიიღეს.

შედეგები შეიძლება შეიცვალოს, რადგან ცესკომ კიდევ უნდა დათვალოს ელექტრონული უბნების დარჩენილი 3% და ასევე იმ ამომრჩევლების ხმების 10%, რომელთაც ხმა ტრადიციული მეთოდით მისცეს საზღვარგარეთ და საქართველოს შორეულ და მთიან რეგიონებში. საბოლოო ოფიციალური შედეგები სავარაუდოდ 27 ოქტომბერს დილით გახდება ცნობილი, მას შემდეგ რაც ყველა ბიულეტენი – როგორც ელექტრონულ, ისე არაელექტრონულ უბნებზე – ხელით დაითვლება.