როკ ჯგუფმა Aerosmith-მა ნაადრევად დაასრულა გამოსამშვიდობებელი ტურნე Peace Out და გამოაცხადა, რომ ტურნეს აღარ აპირებს. ამის მიზეზი ფრონტმენ სტივ ტაილერის ვოკალური იოგების შეუქცევადი დაზიანებაა.

ტრავმის შემდეგ მომღერალმა გამოჯანმრთელება სცადა, მაგრამ დაზიანება იმაზე სერიოზული აღმოჩნდა, ვიდრე თავდაპირველად მოსალოდნელი იყო. ტაილერმა დააზიანა არა მხოლოდ ლიგატები, არამედ ხორხიც.

"როგორც მოგეხსენებათ, სტივენის ხმა ისეთი ინსტრუმენტია, როგორიც სხვა არ არის. ის თვეების განმავლობაში დაუღალავად მუშაობდა, რათა დაბრუნებოდა სიმღერას, როგორც ტრავმამდე. ჩვენ დავინახეთ, რამდენად რთული იყო მისთვის, მიუხედავად იმისა, რომ მას ჰყავდა საუკეთესო სამედიცინო გუნდი. სამწუხაროდ, ახლა უკვე აშკარაა, რომ მისი ვოკალური იოგების სრული აღდგენა შეუძლებელია“, - აცხადებენ ჯგუფის წევრები სოციალურ ქსელში.

Aerosmith-მა თქვა, რომ მათ მიიღეს "საწყენი", მაგრამ აუცილებელი გადაწყვეტილება, როგორც "ძმების გუნდმა". ჯგუფმა პირობა დადო, რომ თაყვანისმცემლებს თანხას დაუბრუნებენ გაუქმებული კონცერტების ბილეთებისთვის. როკერებმა ასევე მადლობა გადაუხადეს თაყვანისმცემლებს მხარდაჭერისთვის და სთხოვეს, დაეკრათ Aerosmith-ის მუსიკა „ხმამაღლა, ახლა და ყოველთვის“ და არ შეწყვიტონ ოცნება.

Aerosmith არის მსოფლიოში ერთ-ერთი ყველაზე ცნობილი როკ ჯგუფი, რომელიც არსებობს რამდენიმე ათეული წლის განმავლობაში. ის შეტანილია ჟურნალ Rolling Stone-ის ყველა დროის საუკეთესო მუსიკოსების სიაში. ჯგუფმა გამოაცხადა თავისი საბოლოო ტური 2023 წლის მაისში: "50 წლის შემდეგ, 10 მსოფლიო ტურნე და შოუ 100 მილიონზე მეტი გულშემატკივრისთვის, დროა ერთი ბოლო ბიძგისთვის!" გამოსამშვიდობებელი ტურის ფარგლებში ჯგუფმა სამი კონცერტის გამართვა მოახერხა.