გული კინოსაკენ მიუწევდა, თუმცა ერთადერთ სპექტაკლში აქვს როლი ნათამაშები. თქვა, რომ შეიგრძნო თეატრის სცენის მტვერი, მაგრამ მაინც კინოში თამაში ერჩივნა. პირველი როლი 15 წლისამ შეასრულა ლანა ღოღობერიძის ფილმში „რამდენიმე ინტერვიუ პირად საკითხებზე“.
ხანმოკლე ცხოვრების მიუხედავად 18 ფილმში მიიღო მონაწილეობა, აქედან ბოლო 3 დაუსრულებელი დარჩა. თავისუფლება როგორც ცხოვრებაში, კინოშიც უყვარდა, ამიტომაც რეჟისორები ხშირად აღნიშნავდნენ, რომ იგი ზედმეტად ნატურალური იყო.

ლევანი ერეკლე მეფის პირდაპირი შთამომავალია. თუმცა, მისი ნაცნობ-მეგობრები ამბობენ, რომ მიუხედავად თავისი არისტოკრატული წარმოშობისა, საოცრად თავმდაბალი და უბრალო ადამიანი იყო. მასში საოცრად ჰარმონიულად იყო შერწყმული გარეგნული და შინაგანი სილამაზე.
თბილისი 1992 წლის 6 სექტემბერს დატოვა. სოხუმში 3-4
საათზე ჩაფრინდა გია ნადირაშვილთან ერთად. შტაბში ბიჭები ტელევიზორს უყურებდნენ. გია შედის და მებრძოლებს ეუბნება: ნახეთ, ბიჭებო, ვინ მოგიყვანეთო და ლევანს აჩვენებს. ყველას გაუხარდა მისი დანახვა: "ეს ხომ მსახიობია, ამას ხომ ჩვენც ვიცნობთ…" იმ საღამოსვე გავიდნენ პოზიციაზე. ის ღამე და მეორე დღეს, 7 სექტემბერს, ნაშუადღევს, ერთად არიან ბრძოლის ველზე: სულხან სულხანიშვილი, გიორგი გაჩეჩილაძე, გია ნადირაშვილი და ლევან აბაშიძე. საბედისწერო ყუმბარა... აფეთქება და ოთხი ბიჭიდან მხოლოდ გიორგი გაჩეჩილაძე დარჩა ცოცხალი.
ლევანმა გაიზიარა 9 აპრილი, სამოქალაქო ომი და დაიკარგა აფხაზეთთან ერთად.

ლევანის პანაშვიდზე პატარა, 12-13 წლის ბიჭების გუნდი მივიდა, ქალბატონმა მანანამ (ლევანის დედა) ჰკითხა: - ვინ ხართ, ბიჭებოო? - ჩვენ ლევანის ძმაკაცები ვართო, - უპასუხეს ბავშვებმა…

ფილმების არასრული ჩამონათვალი ლევან აბაშიძის მონაწილეობით:

1. 1978 წ. — „რამდენიმე ინტერვიუ პირად საკითხებზე“ (სანდრო)

2. 1985 წ. — „ახალგაზრდა კომპოზიტორის მოგზაურობა“ (ახალგაზრდა კომპოზიტორი — მთავარი როლი)

3. 1987წ.— „ფესვები“ (შვილიშვილი)

4. 1988 წ.— „ანემია“ (ნიკა — მთავარი როლი)

5. 1994 წ.— „ბრავო, ჯორდანო ბრუნო!“ (მთავარი როლი)

6. 1992 წ.— „ბედნიერი სოფელი“ (ერთ-ერთი მთავარი როლი)

7.1987 წ.— „სტუმარი“ (ახალგაზრდა კაცი)

8. 1986 წ.— „საფეხური“

9.1986 წ.— „წრებრუნვა» — ეპიზოდში