რამდენიმე თვის წინ სამხრეთ ჩინეთის ზღვაში იპოვეს მინის დინასტიის დროინდელი (1368-1644 წ.) ორი გემის ნაშთი. აღმოჩენა 1500 მეტრის სიღრმეზე გაკეთდა. ასევე ისტორიაში პირველად ჩინეთმა აღმოაჩინა ასეთი მასშტაბური უძველესი გემი ღრმა ზღვაში.
გემების ნარჩენები აღმოაჩინა ჩინეთის მეცნიერებათა აკადემიის ღრმა ზღვის მეცნიერებისა და ინჟინერიის ინსტიტუტის მკვლევარმა ჯგუფმა. მკვლევარებმა აღნიშნეს, რომ აღმოჩენას უდიდესი მნიშვნელობა აქვს მსოფლიო არქეოლოგიისთვის და ასევე დაეხმარება მეტი ინფორმაციის გაგებაში დიდი აბრეშუმის გზის შესახებ - ეს იყო უძველესი სავაჭრო გზა, რომელიც აკავშირებდა ჩინეთს აზიის სხვა ქვეყნებთან და ხმელთაშუა ზღვასთან.

გემების ჩაძირვა თარიღდება მე-15 საუკუნის ბოლოს და მე-16 საუკუნის დასაწყისში და მიეკუთვნება მინის დინასტიას, რომელიც მართავდა ჩინეთს 1368-1644 წლებში. ისინი აღმოაჩინეს დაახლოებით 1500 მეტრის სიღრმეზე სამხრეთ ჩინეთის ზღვის ჩრდილო-დასავლეთ რეგიონში. ორივე გემი ტვირთით იყო სავსე. პირველ გემზე დაახლოებით 100 ათასი ნივთი იყო - ძირითადად ფაიფურის ჭურჭელი. მეორე გემი პირველზე ოდნავ ძველი აღმოჩნდა და ხე-ტყით იყო სავსე, რომელიც ჩინეთში უნდა მიეწოდებინათ.

"აღმოჩენილ არტეფაქტებს აქვთ მაღალი ისტორიული, სამეცნიერო და კულტურული ღირებულება. აღმოჩენა შეიძლება გახდეს ერთ-ერთი ყველაზე მნიშვნელოვანი წყალქვეშა არქეოლოგიის სამყაროში. ეს არის დიდი აბრეშუმის გზის ისტორიის მნიშვნელოვანი გასაღები, იმდროინდელი ჩინეთის ვაჭრობის ისტორია, ”- თქვა იანგ ილინმა, ეროვნული კულტურული მემკვიდრეობის ადმინისტრაციის არქეოლოგიის დეპარტამენტის დირექტორმა.
აღმოჩენილ ჭურჭელს შორის აღმოჩნდა სხვადასხვა სახის მასალა, მათ შორის თეთრი და ლურჯი ფაიფური, ცელადონი (თხელი ფაიანსის მასისგან დამზადებული კერამიკული ნაწარმი) და მწვანე მოჭიქული კერამიკა.