მაშველი ძაღლი 'ტინტო'

ძაღლი სახელად 'ტინტო' შსს-მ სამსახურებრივი ჟეტონით დააჯილდოვა. ამის შესახებ ინფორმაცია უწყებამ 4 მარტს გამოაქვეყნა.

„ტინტო“ არის შინაგან საქმეთა სამინისტროს საგანგებო სიტუაციების მართვის სამსახურის განსაკუთრებულ სიტუაციებზე რეაგირების მაშველი ძაღლი.

სამინისტროს ინფორმაციით სახანძრო-სამაშველო ძალების დეპარტამენტის უფროსის მოადგილემ - მამუკა სეფიაშვილმა მაშველ ძაღლს ჟეტონი თურქეთში სამაშველო ოპერაციის დროს ნანგრევებში მოყოლილი ადამიანის სიცოცხლის გადარჩენისთვის გადასცა.

'საგანგებო სიტუაციების მართვის სამსახურის განსაკუთრებულ სიტუაციებზე რეაგირების მთავარი სამმართველოს კინოლოგიურმა სამსახურმა და მაშველმა ძაღლებმა მნიშვნელოვანი როლი შეასრულეს თურქეთში მიწისძვრის შედეგების სალიკვიდაციო და სამაშველო მისიის დროს' - ნათქვამია შსს-ს ინფორმაციაში.

'ტინტოს' ჟეტონს ქართულად აწერია "სიცოცხლის გადარჩენისთვის". მან 9 თებერვალს, თურქეთში, ქალაქ ადიამანში ნანგრევებში მოყოლილი ცოცხალი ადამიანი იპოვა.

'ტინტო' თურქეთში სამძებრო სამუშაოების დროს