ორწლიანი პაუხის შემდეგ დედოფლისწყაროს მუნიციპალიტეტის მერიამ დედოფლისწყაროში საპატიო მოქალაქეები გამოავლინა. თვითმმართველობის ორგანო ამ სტატუსს წელიწადში 5 ადამიანს ანიჭებს. გასულ წლებში პანდემიის გამო ცერემონიის გამართვა ვერ მოხერხდა.

წელს კი საპატიო მოქალაქის წოდება მიენიჭათ:

ახალციხისა და ტაო-კლარჯეთის მიტროპოლიტს, ხორნაბუჯის, ჰერეთისა და ნეკრესის ეპარქიის დროებით მმართველს, თეოდორე ჭუაძეს "დედოფლისწყაროს საპატიო მოქალაქის" წოდება მიენიჭა. ასევე 2015 წლიდან საპატიო მოქალაქის წოდებას ფლობდა კორონავირუსით გარდაცვლილი მეუფე დიმიტრიც.

ასევე, წელს სტატუსი მიენიჭა ცნობილ ანალიტიკურ მკვლევარს, დავით ქართველიშვილს, ექიმ მარინა ხარაშვილს, რეჟისორს, კულტურის სახლის ხელმძღვანელს ცარო მარტიაშვილს, ღვაწლმოსილ პედაგოგს, მერიის თანამშრომელს ნანული ნატროშვილს.

კულტურის სახლის ხელმძღვანელს ცარო მარტიაშვილს საპატიო მოქალაქეობის წოდება რომ მიენიჭებოდა, ამის შესახებ მის 60 წლის იუბილესთან დაკავშირებულ ღონისძიებაზე ითქვა და დაიდო პირობა, რომ კულტურის სახლის წინ მისი სახელობის ვარსკვლავიც გაიხსნება, თუმცა, როგორც ჩანს ეს პროცესი კიდევ გადაიდო.

.

შეგახსენებთ, წინა შემთხვევაში „დედოფლისწყაროობის“ დღესასწაულზე დედოფლისწყაროს საპატიო მოქალაქის წოდება მიენიჭა: ლაშა ბექაურს (ოლიმპიურ ჩემპიონს); გუჯა ტუჩაშვილს (ხატმწერს, რომლის მოხატული დოქი დღეს რომის იშვიათ ხელნაკეთთა და ანტიკვარიატის ლაბორატორიაში ინახება), შალვა თეთვაძეს (სოფლის მეურნეობის მეცნიერებათა კანდიდატს) და მამა-შვილ ჯემალ და გია ბაღაშვილებს.