„ნაციონალური მოძრაობის“ წევრი რომან გოცირიძე „ფეისბუქზე“ ამერიკის შეერთებული შტატების ელჩის კელი დეგნანის ბიძინა ივანიშვილთან შეხვედრის მართებულობას განიხილავს. გოცირიძე მიიჩნევს, რომ „კელი დეგნანის კრიტიკა იმის გამო, თუ რატომ იხილავს კერძო პირთან ქვეყნის განვითარების მნიშვნელოვან საკითხებს, არასერიოზულია“.

„რატომ შეხვდა ამერიკის შეერთებული შტატების ელჩი ბიძინა ივანიშვილს? იმიტომ, რომ ამერიკის მთავრობას მიაჩნია იგი ქვეყნის ფაქტობრივ მმართველად. ასე მიაჩნია ევროპასაც, აზიასაც და ყველას, ვისაც საქართველოსთან რაიმე სერიოზული საკითხის განხილვა სურს. ეს იმას არ ნიშნავს, რომ ყველა ივანიშვილს ხვდება. პრემიერ-მინისტრი რომ მისი ქვეშევრდომია, ყველამ იცის, ამიტომ ზოგჯერ ამითაც კმაყოფილდებიან.

ამერიკის პრეზიდენტი ჩრდილოეთ კორეის დიქტატორსაც ხვდება, მიუხედავად იმისა, რომ ის არავის აურჩევია.

კელი დეგნანის კრიტიკა იმის გამო, თუ რატომ იხილავს კერძო პირთან ქვეყნის განვითარების მნიშვნელოვან საკითხებს, არასერიოზულია. საქართველოში რომ არაფორმალური მმართველობაა, ეს უკვე ევროპარლამენტის რეზოლუციაშიც კი არის ასახული. ( ისე, ამერიკის კონგრესიც დროზე თუ იზამს ამას, კარგი იქნება). “რადგან გადაწყვეტილების მიმღები რეალური პირია, სხვა გზა არა გვაქვს, რომ არ შევხვდეთ”-ასეთი მიდგომა გასასაგებია. აი, არაფორმალურ მმართველობას საკმარისად რომ არ ამხელ და ოლიგარქიულ რეჟიმს, როგორც ქვეყანაში პოლარიზაციის მთავარ წყაროს, შენი მოქმედებებით სიცოცხლეს რომ უხანგრძლივებ, ეს კი ძალიან ცუდია. ეს საყვედური ელჩებს არ ეხებათ, ისინი თავიანთი მთავრობების დავალებებს ასრულებენ.

იმ ტროიკისა არ იყოს, უნდა დავტოვო დროებით პარტია, რათა მეც გამეხსნას ხელ-ფეხი ოლიგარქიულ რეჟიმთან შემგუებელი ჩვენი საერთაშორისო პარტნიორი ქვეყნების საკრიტიკოდ“, - წერს გოცირიძე.