„ბათუმში არჩევნები ოცნების გამარჯვებით 70:30 დასრულდა. ტექნიკურ ნაწილში ყველაფერი მშვიდად ჩატარდა, და ჩემი დაკვირვებით, ფანატიკოსი-ნაცების გარდა, ყველა მიხვდა, რომ არჩევნები ოპოზიციამ რეალურად წააგო.

ახლა, მხოლოდ, იმაშია საქმე, დაფიქრდებიან ნაციონალურ მოძრაობაში წაგების მიზეზებზე თუ არა. შეუძლებელია, ყველაფერი სუს ან ფულს დააბრალო. 40%-იან სხვაობას ხელოვნურად ვერ დასვამ და წაგების მიზეზი მათ შორის ოპოზიციის მხარესაც არის.

ჩემი აზრით, პოლიტიკურ ნაწილში ნაციონალური მოძრაობის მთავარი პრობლემა - ნიკა გვარამია და ძირითად ოპოზიციურ ტელევიზიაზე მის მიერ მოწყობილი უსასრულო დრამაა. ახალ ამომრჩეველს ამით ვერ მოიპოვებ, ხოლო ამომრჩევლის ნაწილს ადრე თუ გვიან 24-საათიანი კივილი: „ოცნება - რუსები არიან და ამიტომ მიშას დაუჭირეთ მხარი“, მობეზრდება. იმედია, ეს არჩევნები დააფიქრებს მიშას, რომ ასეთი გუნდის ხელში ის ციხიდან ვერ გამოვა.


ამის სანაცვლოდ, „მთავარი“ კომპეტენტურ ადამიანს უნდა გადააბარო, რომ იქ კრიტიკული დისკუსია და შიდა ოპოზიციური დებატები მიდიოდეს, რათა ოპოზიციის შიგნით უკეთესი იდეები და მეტად პერსპექტიული პოლიტიკოსები გაიფილტროს. ნაციონალურ მოძრაობაში იდეების დეფიციტის გამო, ეს ყველაფერი ნაციონალური მოძრაობის რეიტინგს დაწევს, მაგრამ ზოგადად ოპოზიციას გააძლიერებს და 2012 წლიდან პირველად რეალურ პრობლემას შეუქმნის ქართულ ოცნებას. ახლა, ამაზე კარგს მიშა ქვეყნისთვის მაინც ვერ გააკეთებს.


თუ მთავარი გადაეწყობა, მას დანარჩენი ოპოზიციური მედიაც მიყვება, შედეგად კი ჩამოყალიბდება ოპოზიცია, რომელსაც აქვს იდეა და ყავს პოლიტიკოსები, რომლებსაც ამ იდეების მართლაც სჯერათ. უიდეობას, კონფორმიზმსა და შიშს უიდეობით და დრამით ვერ დაამარცხებ. მას იდეები, ამბიციები და უკეთესი საქართველოს ხედვა უნდა დაუპირისპირო.


ახლა კი მხოლოდ იმ იმედით ვართ, რომ ღარიბაშვილის მორიგი სამარცხვინო განცხადების შემდეგ, ჩვენი მოსახლეობა საბოლოოდ გაბრაზდება და მოიშორებს ამ მთავრობას. თუმცა მიშა და მისი მედია, სადაც საღი აზრი და დისკუსია დიდი ხანია, რაც დაბლოკილია, ყველაფერს აკეთებს, რომ ოცნების მმართველობა რაც შეიძლება უფრო დიდი ხნით გახანგრძლივდეს", - წერს რაქვიაშვილი.