საზოგადოება
"მერე რომ არ თქვათ, ახირებული ხარო - მაინც გაგებინებთ..." - რა ინფორმაციას ავრცელებს თამარ ჩერგოლეიშვილი
2022, 31 მარტი, 14:24
"ამომრჩეველთა განათლების საზოგადოების" (VES) დამფუძნებელი თამარ ჩერგოლეიშვილი სოციალურ ქსელში დაანონსებულ 3 აპრილის აქციასთან დაკავშირებით პოსტს ავრცელებს და ოპოზიციური მედიის წარმომადგენლებს საჯაროდ მიმართავს:
"მერე რომ არ თქვათ, ახირებული ხარო - მაინც გაგებინებთ, რომ ტელემედიებს აქციაზე ველაპარაკებით ჯერ შინაურულად, არც ვჩხუბობთ, არც - რა.
ანუ ახლა რომ ნაცების აქცია იყოს დაანონსებული მიშაზე, ოპო ტელემედია რა დღეში იქნებოდა ხომ იცით? მოღალატედ იქნებოდა შერაცხული ყველა პარტია, ვინც არ უერთდება.
ჩვენი აქცია ქართველი ხალხის ისტორიულ მისიაზე და ჩვენს ეროვნულ მიზანზეა!
ჩვენს აქციაზე ჩვენს სათქმელს ჩვენი ეროვნული გმირები იტყვიან!
ჩვენი აქცია იმაზეა, რაც ყველა პატრიოტს გვაერთიანებს!
მოკლედ მე არაფერს ვიძახი - უბრალოდ გაკვირდებით! და მინდა სხვებიც დაგაკვირდნენ"- წერს "ტაბულას" დამფუძნებელი თამარ ჩერგოლეიშვილი სოციალურ ქსელში.
შეგახსენებთ, რომ კვირას, 3 აპრილს, 20:00 საათზე, პარლამენტთან უკრაინის მხარდასაჭერი აქცია სახელწოდებით - "უკრაინისა და ჩვენი თავისუფლებისთვის" გაიმართება. აქციის ორგანიზატორები არიან - "ევროპული საქართველო", "თავისუფლების ინსტიტუტი", "ტაბულა" და "ამომრჩეველთა განათლების საზოგადოება".
"თვეზე მეტია უკრაინელი ხალხი თავისუფლებას ბოროტებისგან თავდაუზოგავად, უდიდესი სისხლის ფასად იცავს!
სამყარო შავ-თეთრად გაიყო, თავისუფლების მხარდაჭერა დღეს უკრაინის მხარდაჭერას ნიშნავს და ყველა თავმოყვარე ერის ღირსების საკითხია!
საქართველოს ხელისუფლება ეროვნულ ღირსებას გვილახავს
მტრის ვერ მცნობ და მოყვრის მგმობ საზოგადოებად წარმოგვაჩენს რომელმაც წარსულიდან ჭკუა ვერ ისწავლა, მზადაა უსაფრთხოების ილუზიისთვის თავისუფლება დათმოს და შედეგად, თავისუფლებაც დაკარგოს და უსაფრთხოებაც!
100 წლის წინ, ჩვენმა დემოკრატიამ სამი წელი გაძლო, სანამ რუსული მონსტრი დაიპყრობდა და ტვინს, გულსა და სულს ამოაცლიდა!
ახლა 30 წელია ვძლებთ! მაგრამ, თუ ასე გავაგრძელეთ - დიდია საფრთხე თავისუფალ სამყაროსთან დამარცხებული პუტინის გავლენის ჭაობში ჩავრჩეთ
და თავისუფალ სამყაროში თავის დამკვიდრების ისტორიული შესაძლებლობა დავკარგოთ.
ახლა, როგორც არასდროს გვჭირდება მოვიკრიბოთ ძალა, გავიხსენოთ რა დევს სასწორზე და ჩვენი ისტორიული მიზნის დასაცავად გავერთიანდეთ.
ევროპული საქართველო, თავისუფლების ინსტიტუტი, ტაბულა და ამომრჩეველთა განათლების საზოგადოება 3 აპრილს გამართავს აქციას უკრაინისა და ჩვენი თავისუფლების მხარდასაჭერად.
აქციაზე მოისმენთ სიტყვებს, მაგრამ არ იქნება არცერთი სიტყვით გამომსვლელი.
აქცია მიეძღვნება ეროვნულ მიზანს.
მიზანს, რომელიც ყველა ჩვენგანზე ბევრად დიდია და გაერთიანების ძალას გვაძლევს, როდესაც შეუთანხმებლად, განურჩევლად პარტიული გემოვნებისა, ქუჩაში გავდივართ.
3 აპრილს, 20:00 საათზე ვიკრიბებით პარლამენტთან უკრაინის მხარდასაჭერად, ძალის მოსაკრებად და საერთო მიზნის გასაცხადებლად!
თავისუფალ უკრაინას და საქართველოს გაუმარჯოს!"- ნათქვამია აქციის პრესრელიზში.
